Sa Taktakon

Andam na nga mulakaw human sa sayo nga pamahaw

Madasigon nga mupadulong paingon uban sa usa ka panon

Takin na ang amol nga sundang, pinahait sa bato nga bairan

Paniudto nga mais ug buwad giumol sulod sa hinawob dahon-saging

Mao sa kanunay dad-on ug dili angayan nga hikalimtan...

Binistihan sa tag-as nga sapot, karsones-maong ug butas

Maoy miputos sa kalawasan aron kini mapanalipdan

Buyot gipas-an, butangan unya sa bahin sa inanihan

Misugod na og taghoy sa pagbaktas maoy timailhan

Sa among adtoan, pipila ka bungtod among agian...

Sa gipang-agian mga tunukon sampinit sa akong panit migunit

Perdagones, buwak niini nindot ug duga tam-is supsupon

Karaang payag nga ginama sa kawayan giatpan og kugon

Sa kiliran niini, dakong tadyaw nga gilumot puno sa tubig uwan

Daghan ko og kagahapun dinhi lang nako natagamtaman...

Sa pagtungtong sa mga gipangkapoy’ng bagtak mao’y nasiplatan

Nagkadaiyang talan-awon nga nagkarambola apan kanindot tutukan

Prutas nga namungingi, kaanindot pupuon sa pungpong

Apan pagmatngon kay kini giliyukan sa mga hulmigas

Mga sundawong gagmay kasakit mamahit, mga tigbalantay...

Mga hagunoy’ng-sagbot ug dagkong punuan sa kahoy lami sud-ungon

Inig hangad mo sa nagkarambolang panganod nindot gakson

Hangin nga presko ug bugnaw walay sama midulot sa kabukugan

Huni sa mga langgam mumura ug duna’y gustong ihunghong

Nga dinhi lang sa taktakon, damgo ug pangandoy sayon kab-uton...