Lawig, balangay... lawig!

Tinagik ni Maria Eleanor Elape Valeros

Lawig, balanghai, lawig

sa hanging habagat tinayhopan

halok sa bag-ong buwan

pakiglambigit pagbalik sa kadagatan

buhing saksi sa Malayo ta’ng kagikan.

Lawig, balangay, lawig

sa mga balod pauraray

hagbay ‘mong gikamingawan

kahidlaw sa itom nga sulog

nagduso dinhi’s pinulongang Austronesian.

Sukad sa Manila paanod ngadtos Siluag

hapit sa Boracay, Mactan, Cagayan de Oro

eskala Zamboanga, General Santos, Davao

lahos tumoy sa Sulu, sa Tawi-Tawi sangko

2,108 milya; 3,908 kilometro.

Gibanhaw ka sa Sibutu ug Sitangkai

nilang Jubail Muyong ug Haji Musa Malabong

giumol pagbalik sa batid nga mga “panday”

trato nila ang baroto’g bugsay.

Lawig, balangay’ng bagis lawig,

bisa’g wa’y usa’ng lansang milagbas sa imong gusok

mata’g gingi gisungsongan sa dagta sa bakhaw

giumol sa kinaraang kahimanan – bangkung ug patuk

ginama sa Dungon aron dili mohunit-mohumok.

Ipakayab ang kaalam sa karaang marinero

kaabag ang hangin, paglalin sa kalanggaman, panganod

taliwala sa gipanghambog nga teknolohiya

kabitoonan gihapon ang di matuis nga giya.