Pangandoy

Kinsa ka ba nga akong panumbalingon?

Kinsa ka ba nga akong gukdon?

Ngano ug maghayang lang ko ug maghulat

Daw bayabas mag-atang kanus-a ka matagak.

Kinsa ka ba nga sa pagtagad akong gahinan?

Ahay! Ikaw ra man diay kadtong gilak sa unahan

Ang madanihong hayag nga pagkalihukan

Nga gibugtaw sa mga buhi dinhi sa kalibutan.

Ikaw ra man diay kadtong naghatag lingaw

Niining biyahe nga puno sa tiaw

Ikaw ra man diay ang akong gitinguha

Pangandoy! Ikaw ra man diay kana.

Kami mibugtaw ug milanat kanimo

Nangindahay nga makuptan bisan imong anino.

Kay sayud mi unsang kalipay ug himaya

Ang matagamtam uban nimo dinhi sa yuta

Usahay dangaw na lang ang gintang

Maabot na ang gilak sa imong nahimutangan

Apan kun dili igmat mahanaw sa atubangan

Kay gilabni na sa hakog nga kapalaran.

Sa ubang nakigbisog nadakpan na ikaw

Apan ang tawo walay pagkatagbaw

Lain na pud nga pangandoy ang ipandaypanday

Ug magsugod na usab ang kulbahinam nga

ginukdanay.