Gibiyaan ko ang daw kamatuuran
Sa dihang nahimamat ko
Ang katakos sa adlaw nga nagkinabuhi
Sa kahayag sa paglamdag.
Nibiya ko sa naandang pagtan-aw
Sa tipik ug binuak lamang
Kay kini mobala-ud ug kangitngit
Aron matago ang husto ug makiangayon
Ug nasabtan ko
Nga kinatibuk-ang kahayag ug paglamdag
Nga gihandum sa matag usa.
Bisan kini gidaganan, gibalibran, o gisalikway
Ug nasabtan ko usab
Nga matag pasiplat sa makanunayong pagbag-o
Sa nahimutangan ug hugis sa mga panganod,
Adunay kamatuurang dili malimod:
Buot natong tanan nga mabuntog
Ang padayong nagpangusog
Mapabilin ang matinamayon
Ug mahadlukong panghuna-huna
Ug sa kinailadman sa atong kasingkasing,
Giawit nato ang pagkaplag og bitu-ong
Padayong makigtambayayong
Ug makighiusa sa yuta sa iyang pagdan-ag
Aron maamuma ang kinabuhi inay maulipon
Sa nagmagahi pagpadayon sa bidlisiw
Nga nagdala sa kinaadmang
Kagawasan nga nagatahod sa tanan.
Dili matugkad ang kasingkasing
Sama nga dili malantaw ang kalag
Apan karon nga may nakita na ako,
Gidapit ko kamo sa pagkuyog. Karon.
Karon dayon. Aron bisan hisugatan natong
Nagpalabi-labi ang kasadpan, maabtan natong tanan
Ang ugma diin kitang tanan nagkuyog ug nagtampo
Sa pagpalambo sa kahulugan sa silangan.