(Gipahaoma’g tono ni Ramil “Tata” Tanuco alang sa 2nd album sa Bisdak band Saving Kamagong)
Napapas na kuno ang Kiribati, naunlod sa Pasipiko
Nalapasan sa parat nga tubig, nawala na sa globo
Nalunopan ang komunidad, nangkagiw mga tawo
Nalumos ang mga damgo, nangahanaw daw aso.
Gibasol mga katawhan, kuwang sa pagpakabana
Giugmad nga fossil fuels, puhunan sa pamentaha
Gidam-ok nga basura, nakapasamot sa pagbaha
Gipadagan lang gihapon, bisan sakyanang guba.
Particulate matters, nagtuok sa kapunawpunawan
Carbon dioxide emissions, naghilo sa kawanangan
Chlorofluorocarbons, naglumos sa kalangitan
Greenhouse effect, nakapaigang sa kalibotan.
Nagkabuang ang panahon, kayutaan gipanghilantan
Mitaas ang paglantong, kanhi mabaw’ng kadagatan
Migara ang mga bagyo, pagtipas sa ilang agianan
Mipabuhagay ang ulan, nangdahili ang kabukiran.
Brown winter nahitabo na, wa’y niyebeng nahagbong
Buwak namuklad sab kay Antarctic inanay’ng napagtong
Busloton na ang ozone layer, wala na’y kapuy-ang tarong
Bangaw gihugonhugong motul-id, kay tawo mapatuyangon.