Si Owie ug ang Milabay niyang Kagahapon

CEBU, Philippines - Sama lang sa gilangoy ang halayong pinuy-anan niyang Amoy. Balod iyang gitadlas paingon sa yutang Pilipinas. Si Owie nanimpalad sa ugma damlag. Hipalgan niya ang babayeng Pilipina. Tulo ka himsog nga bata sa kahitas-an sila gigantihan. Walay swerte si Owie kay sa gubat sa kalibotan siya nasakpan. Sa tumang kalisang kaming tanan sa bukid sa Aloran kami gitago-an, aron sa kabangis sa mga Hapon kami dili mahiagoman.

Halawom namong gihandom... ay! Nanay Felisa, banagbanag pa sa kabuntagon, puto ug bibingka imo nang giha-on. Nay To, Nay To, mao ra intawon ang malitok sa mga gutom nga bata. Gisubli ko ang milabay’ng panahon. Owie hataas ang giantos mong halawom nga lawod sa pag-antos. Sakit ra unta sa dughan, apan gidawat na ang tanan, kay badlis man sa kapalaran. Taghoy ug singgit ni Owie, Ayeng, Apen, Achian, hala dagan sa pagpauli mga batang timawa, aron sa latigo ni Owie kamo dili magulpi.

Catalina among gihandom nga inahan, nganong sayo mo kaming gibiyaan. Sama ka sa usa ka binuhat nga walay kabangkaagan, siyam ka metros yuta sa Culpan, kami imong gibinlan, kay imong igsoon ikaw gilopigan.

Gihanggab namo ang mabugnaw’ng yamog sa kabuntagon, aron sa bantak ug pasol bukharon. Likete sa ilabo , bul-og sa tubig nga sulog ilawom sa batang dako, gisikop ko ang kaluko, uwang sinikpan, usaba sa bato sa suba ang makuha sarang nga among masud-an. Luy-a ug asin inubanan sa kaguol, miagas ang mga luha, ug sa luto nasagol.

Diyutay’ng makutlo sa bukirang Sta. Ana, hinungdan ang  kagutom sa pamilya. Si Owie ni Khenga gikasab-an tungod sa kakabus ang gikaingnan. Pamahaw matag buntag, binahugan lang sa tubig ug camay aron sa kabusog ug tanan maangay. Gisampit ko ang mipanaw’ng iyaan, ang bulawanon mong panahon  imo lang giusikan, gipalabi mo ang balay sama sa Casino, antog sa wala, antog sa tu-o hinungdan ang tanan mong anaksa pagpa-edokar walay nahimo. Miabot ang hataas nga ugma, sa imong kagutom, ug sa kalisod walay imong anak nagpakabana. Hangtod sa pagbiya mo sa kalibotan tabla ang tanan.

Apan ang Dios nga Labaw’ng Makagagahom, talithi sa Iyang kalooy kanamo naangkon...