Dear Hangin

Dear Hangin,

Kumusta man ang imong kahimtang karon?

Kay sa wala pa ko mahimugso, anaa ka na ning kalibutan. Ikaw ang gihanggap sa nagkalain-laing matang sa mga pananom, hayop ug sa akong kaliwatan. Ang mga bulak namukadkad sa kalipay, mga dahon naglayat-layat sa kamaya ug walay pu-as ang paglupad sa mga langgam sa tumang kasadya.

Maka-ingon gyud ko nga bulahan gyud ang kalibutan kay tungod nimo, hangin, na-agak ang kinabuhi sa kayuta-an. Sa bisan asang dapit sa kalibutan, may hangin nga mahanggap sa tanan. Ikaw usab nagpanalipod kanako sa tumang ka-init ug kabugnaw sa kalibutan. Gitagaan mo ako og sakto nga temperatura aron makapadayon sa akong panaw.

Ug sa madugay wa ako magdahom nga ikaw hangin, akong nataligam-an ug napasipad-an. Dinuyogan sa padayon nga pag-abante, pag-abot sa teknolohiya, ikaw natalikdan. Ang kalesa gihulipan og mga sakyanan. Ang mga mano-mano giilisdan og mga makinarya. Adunay mga sakyanan nga ang tambutso daw duga sa ginamos ang binuga nga aso. Polusyon! Lakip na ang mga pabrika, di masukod ang kabaga sa itom nga aso ang gibuga. Polusyon!  May mga basura usab sama sa plastic, ligid ug uban pang mga goma ang gisunog. Polusyon!  Padayon usab ang pagsunog sa lana ug sa uling aron maghatag og kuryente sa tanan. 

Apan sa ingon nga duyogan unta nimo ang pag-abante, imo hinuon ako nga nababagan. Nakasinati ang kalibutan og taas nga temperatura sa kabuntagon ug labihang ubos sa kagabhi-on. Mao na kining global warming ug ang kalit nga kausaban sa  klima.  Ako ug laing mga may-kinabuhi nakasinati usab og daghang kausaban.Sakit sa baga, ilong, ubo ug uban pa akong nasuwayan. Labing pait niini, ang kamatayon sa akong kaliwatan.

Pagkapa-it sa binuhatan, wala nahuna-hunaan ang epekto niini kanimo, pinangga nga hangin. Para nako dili man sayop ang pag-abante, kung ikaw mabantayan lakip na ang tibuok nga kalikupan. Mao nga, daw ako maka-ingon, ang nabitik gyud ko sa akong binuhatan.

Ang maayo karon ang magmabinantayon ug pag-atiman kanimo, hangin. Bisan sa gamay nga binuhatan, dako na kini og epekto kung i-suma total sa uban. Ang sakto nga paggamit sa kuryente, paglakaw kung duol ra ang destinasyon, pagpananom og mga kahoy, pagreduce, reuse ug recycle, pag-apil-apil sa mga grupo alang sa atong kalikupan, igong tabang na kini aron mapugngan ang mga epekto sa sayop nga mga binuhatan. Ang mga  sakyanan angay usab nga ipatan-aw sa mga emission testing aron nga mahibaw-an nga dili pa kini makadaot kanimo. May mga panawagan usab sa renewable nga enerhiya.

Magpakabana na ako, manginlabot ug mag-apil-apil tungod ug alang kanimo ug kanako.

Naghigugma,

Tawo