Mga politiko gipahimangnoan sa kaparian

CEBU, Philippines — Mga kadagkoan sa Basilica Minore del Santo Niño niawhag sa mga kandidato alang sa eleksiyon sa sunod tuig nga dili gamiton ang pista alang sa ilang politikanhong ambisyon ilabi na nga hugopan kini sa liboan ka magtutuo.

Matud ni Padre Jules Van Almerez, tigpamaba sa Basilica Minore Del Sto. Niño nga ilaha gihapong ikonsidera nga mga deboto ni Santo Niño ang mga politiko apan mas maayo nga dili lang kaayo sila mohimo sa ilang mga kalihokan kalabot sa politika ug ilahang ikonsidera usab ang uban nga mga magtutuo.

Si Almerez nagkanayon nga mas maayo usab nga ang mga politiko mosul-ob og sinina subay sa relihiyoso nga kalihokan ug moapil sa selebrasyon isip magtutuo ug makighiusa sa uban.

Ug kong mahimo ang mga political aspirant kong mosulod sa Basilica mas maayo nga ang isul-ob nga sinina dili sa ilang tinguha nga magpapili nga makaagaw na hinuon sa atensiyon sa mga magtutuo.

Sa laing bahin, anaa na sa 70 porsyento ang pagpangandam sa mga kaparian nga Agustino alang sa nagsingabot nga ika-460th Fiesta Señor sa Enero 9 ngadto sa 29, 2025 ubos sa tema nga “Sto. Niño Hope of the Pilgrim Church”.

Atol sa gipahigayon nga press conference kagahapon sa buntag gipakita na sa mga kaparian nga Agustino ang mga gihan-ay nga kalihukan gikan sa pre-fiesta activities nga naglangkub sa pagbisita sa imahen sa Santo Niño ngadto sa mga tambalanan, simbahan ug prisohan.

Human sa pagbisita sa Santo Niño mobalik kini sa Basilica sa Enero 8, 2025 usa ka adlaw sa dili pa hingpit sugdan ang misa novena sa alang sa pista.

Gipahibalo usab sa mga kaparian ang mga rota sa Walk with Jesus, Walk with Mary ug traslacion ngadto na sa penitential walk sa bespiras.

Gibutyag ni Almerez nga anaa pa sila sa 70 porsyento tungod kay padayon pa sila nga naglihok sa mga papeles alang sa mga pagsira ug paggamit sa mga kadalanan lakip usab ang pakig-alayon sa BRT nga mahuman na ang mga rota sa prosisyon o agianan sa dili pa matapos ang tuig apan kong dili gyud ilaha usab kini nga pangitaan og pamaagi.

Padayon usab ang ilang pakig-alayon sa nagkadaiyang ahensiya sa gobiyerno aron magmalamposon ang nagsingabot nga Fiesta Señor.

Gipresentar usab sa mga kaparian ang mahimong Hermano ug Hermana Mayor 2025 Fiesta Señor ug lakip usab ang gallon nga gamiton alang sa fluvial procession.

Ang kaparian niawhag sa mga magtutuo nga padayon gihapon sa pagsunod sa mga pahimangno lakip usab sa gipatuman nga dress code aron sila makasulod sa simbahan. (BANAT NEWS)