Bulan, Pagkatahum Mo

May mga gabii dayag ikaw nga modan-ag

Modasig kanako pagtagik hamubong balak

Kay sa matag higayon nga magpahipi ka

Sa daw kurtinang nipis nga mga panganod

Sama ka gayud sa matahum nga dalaga

Naglamat kanako aron kanimo mahigugma

Usahay masud-ong ko na usab ikaw

Kanang manambo ka sa kayda sa langit

Makaibog ka kaayo nga nagpahiyom

Nag-agni kanako aron imo akong maulipon

Apan anugon ang pagtinguha ko kanimo

Sa bira sa nangandoy ako og kapakyasan

Kay ang gilay-on, kanato nag-uwang

Dili ko gayud kahagdanan ang kahabog mo

Aron ang akong kaibog ipadayag ko.

Oh, Bulan...pagkatahum mo gayud

Ang di ko makab-ot nga imong gilay-on

Igo ko na lang ikaw nga pagahangdon

Kay bisag unsaon ko sa pagpaninguha

Nga ikaw ako gayud nga maangkon

Mapakyas gayud ko, kay dili angay kanimo

Kay ako — usa ka alaot nga anino

Daw ulod lamang naghangad sa kahayag

Sa imong langitnon nga kaanyag...! Dibuho ni Ramon Taguchi