Glass of Dirt EP album "Duot sa Bukog" ilusad ugma

Panahon na sa ting-giok human sa "duot sa bukog" nga mga panlimbasog sa pagpananom. Mao na kini ang mga kalamboan karon sa nataran sa Bisrock. Maglagubo ugma, Marso 10, ang Handuraw Events Cafe sa pagtikang sa entablado sa Glass of Dirt nga gilangkoban nilang hardcore metaller Lawrence "Loloy" Amante (vocals ug guitars), ang headbanger nga si Great "Gege" Englis (drums) ug ang metalhead nga si Warren Martinez (bass) isip pagpalanog sa pagkahimugso sa ilang Extended Play album nga giulohan og "Duot sa Bukog".

Makigsawo sa kagahob sa maong okasyon ang Bisrock pioneers Jimmycycle, Missing Filemon, ug Aggressive Audio kinsa nakahaling sa kainit, ngadto na's pagdilaab sa interes nga amomahon ang talento, sa mga nanagsunod nga mga Bisrock bands - Indephums, Mantequilla, Makadawa, What's the Frequency, Fervent, Stonestomp ug All Traffic. Gipabukal pa kini pag-ayo sa nag-alintabong talento sa mga bag-ong natukod nga mga banda sama sa Metal Instinct, Emphatzu ug Q-bic nga karon naningkamot usab nga makaambit ning maong kalamboan.

Gilingi sa Glass of Dirt ang inspirasyon nga gipabuhagay sa Jimmycycle nga maoy nag-una pagsumite sa ilang materyales ug naghatod sa lisod tuhoang pagkaylap sa paningog nga Bisrock. Gitataw ni Loloy nga labing una niyang nadunggan ang paningkamot sa Jimmycycle nga paminawon pinaagi sa "Lansiao".

"Jimmycycle maoy nagpugas og una sa mga liso. Gutsy gyud nga move at a time nga hapit tanang radio stations miyamiid sa mga CD samplers sa Bisdak-written songs. Good thing Smash nurtured the gift through "Tingog Kabataan" program. Dili gyud ni maingon ani og wala pa ang Jimmycycle nga nikulit gyud og iyang dalan latas sa unsa'y convenient niadtong panahona," paghinumdom ni Loloy.

Mabati sa "Duot sa Bukog" EP album ang mga kantang Basol, Escort, Kuyaig ug Tingog sa Mamumuo. Ang GOD kanhi nang nagtangag sa bansagong "bug-at". Nagpasabot kini og "thick, heavy, guitar-and-drums-centered sound typical of metal music" nga mogamit og "highly amplified distortion of guitars" ug ang kontribusyon ni Warren pinaagi sa pagtukar og "repeated riffs and pounding rhythms" nga kaluhaan sa "typical intentional sounding vocals" nga gipahaum ni Loloy, ug koronahan sa makapalayat-layat, makapa-tumbling ug makapa-split nga drumplay ni Gege.

Niadtong Mayo 25, kalmado pa ang GOD tungod kay sila lamang ang matawag og Bisrock metalheads sa nataran sa Bisrock. Buot ipasabot wala pa sila'y nalantawang kaparang kon ang maong istilo lang ang pagahisgotan. Apan hapit motangkod napulo ka buwan pagkahuman nila kadto buhi-i ang maong pamahayag, ang 1970s music style nga gipakatap sa Black Sabbath, Deep Purple, Iron Maiden, Led Zeppelin; sa Alice in Chains, Sound Garden, ug Metallica, taliwala sa kalawran sa lain pang mga metal maniacs, nakahatag og inspirasyon sa pagbarog sa lain pang mga hugpong sa mga brown metallers. Ug dinhi ning tungora natagamtaman ang ebolusyon sa Bisrock metal, ilabi na sa pagtuyhakaw sa "socio-civic consciousness" nga gipalanog sa bag-ong bandang Metal Instinct.

Mayo sa nakalabay'ng tuig sa diha'ng nagsugod pagpanikay-sikay ang GOD alang sa paglusad sa ilang EP nga may lima ka tracks. Gisulat ni Gege ang "Basol", samtang gitagik ni Loloy ang "Kuyaig".

Ang "Kuyaig" usa ka matawag og kampanya batok pag-abuso sa ginadiling drogas. "Nakuyaig na ka/nakuyaig na kaperte na gyung daota/nakuyaig na ka/perte na gyung niwanga/nadaot sa bisyo/natay-og ang ulo/undangi na ninyo/bisyo nga wa'y ayo."

Samtang, sa kantang "Basol" gihulbot ang ulohan sa ilang EP album. May kalabotan kini sa mapait nga kasinatian sa paryente ni Gege. "Na-a na sad silawala'y laing mahimo kung di basolon ka/naa na sad sila/wala'y laing mahimo kung di paluhaon ka du'ot sa bukog ang insulto/duot sa bukog ang pagtonto/Sakto na."

Ang pinakadakong kalamboan sa karir sa GOD mao nga natahasan sila'ng mangunay pagsulat sa "Tingog sa Mamumuo" nga nagsilbing theme song alang sa dyLA May 1 Labor Day celebration. Kini tungod kay ang sibyaanan mismo gipadagan man sa usa ka "confederate of trade unions."

Usab, ilang nahatagan og "metallic" nga paningog ang "Pastilan Kanimo No. 1" atol sa "Bisrock to the Max" concert nga diha gipahigayon sa Millennium Park, Lapu-Lapu City niadtong Pebrero 24 isip pagtamod sa mga natampo ni Sugbuanon novelty music icon Maximo "Max" Surban sa musikang Sugbuanon.

Ning bag-ohay lang, ang ilang komposisyong "Escort" nakadawat na usab og ubay-ubay nga airplay requests. May kalabotan kini sa mga babayeng mas pilion pa'ng magpuyo sa "hayang lami, barog sapi" nga prinsipyo kaysa disenteng manlimbasog nga duot sa bukog ang paningkamot sama sa gibuhat sa Glass of Dirt. Nahimo kining relevant tungod kay gisaulog man karon ang Women's Month isip paghatag og bili sa kontribusyon sa mga kababayen-an sa pag-ugmad ug pagpalambo sa katilingban.

Ang paglusad gipaluyohan sa The FREEMAN, Banat News, Handuraw Events Cafe, 93.1 Smash FM ug BBC Printshop. Entrance fees mahimong P80 nga may libreng usa ka botelyang beer bugnaw o kaha usa ka hiwa sa Handuraw pizza. Apan kun mobayad og P150, lakip na niining ipataban ang kopya sa "Duot sa Bukog" album gawas sa libreng beer o kaha pizza.