Sabong

Mitinuod na sa ilang ataki ang mga kontra ni Bise Presidente Sara Duterte Carpio. Apan sa akong nakita dili lamang mga kontra sa bise presidente miataki kaniya, miapil usab sa pag-ataki kaniya, ang mga kontra ni Presidente Bongbong Marcos.

Sa unang impeachment complaint, ang mipasaka niini mga iladong tawo nga kontra sa mga Duterte samtang ang miindorso mao ang party-list group nga Anakbayan nga wala pay administrasyon nga naglingkod sa Malakanyang nga ilang gisuportahan. Ilado kini nga grupo nga magsige lang og panaway sa mga molingkod nga administrasyon sa gobiyerno.

Ang mga nag-ambisyon sa tuig 2028 nga bugnong lugaynon naghiusa sa pag-ataki sa Bise Presidente ug nagmalamposon sila sa una nilang ataki. Ang una nilang ataki mao ang pagbuwag sa Presidente ug Bise Presidente.

Gipaniguro sa mga may ambisyon sa 2028 nga magbuwag si Presidente Bongbong Marcos ug Bise Presidente Sara Duterte Carpio aron dili higante ang ilang ikaparang nga kontra.

Gisabong ang duha ka tagas nga opisyal sa nasud. Ang problema kay misakay ang Bise Presidente sa paon sa iyang mga kontra.

Human nagmalamposon sa unang ataki ila nang gisunod ang ikaduhang hugna nga mao ang pagtangtang na sa Bise Presidente sa iyang katungdanan pinaagi sa pag impeach niini.

Gipatigbabaw gayod sa mga ambisyoso ang ilang ambisyon sa tuig 2028. Wala gayod sila maghunahuna sa kalisod sa katawhan. Seguro ang mga nagpasiugda sa impeachment nagtuo nga makapalit na ang mga tawo og tag P20 nga kilo sa bugas, mogamay na ang gidaghanon sa mga walay trabaho ug mobarato na ang mga palaliton, dili na ka matolis sulod mismo sa imong panimalay ug luwas na ang atong paglakaw sa kadalanan sa Pilipinas.

Maayo unta og dili malimtan sa katawhan ang gibuhat nga kaboang ning mga ambisyoso ug ambisyosa.