'Golden Boy' Yulo gisaytan dayon ang 2028 LA Olympics

CEBU, Philippines — Lab-as pang nabalik sa nasud gikan sa malampusong kampanya sa Paris Olympics, ang giyukboan nga "Golden Boy" sa Philippine sports karon nga si Carlos Edriel Yulo mipadayag dayon sa sunod niyang misyon.

Kini way lain kondili ang 2028 LA Olympics didto sa Amerika.

Mao kini ang gisaad ni Yulo atol sa iyang pagtaak og balik sa yuta niyang natawhan niadtong Martes sa gabii.

“Nanalo tayo ng gintong medalya,” matud pa ni Yulo sa dihang nahinabi sa mga tigbalita nga misugat kaniya sa iyang pag-abot didto sa Ninoy Aquino International Airport duha ka gabii na ang milabay.

“Of course, meron pa po akong isa pa pong Olympics sa 2028, paghahandaan kop o yun nang mabuti at magpa-practice pa po ako nang maigi," dugang pa niya.

Si Yulo mihimo og kasaysayan didto sa Paris Games human milangkat og duha ka gold medals sa men's vault ug floor exercise sa artistic gymnastics.

Nagkanayon si Yulo nga maningkamot pa siya og maayo alang sa umaabot nga Olympics gumikan kay sayud man siya nga ang iyang kadaogan dili lamang alang sa iyang kaugalingon apan hasta sab sa tibuok nasud nga Pilipinhon.

 “Ang panalo po namin, panalo po nating lahat,” kanayon pa ni Yulo.

Sa pagka karon hinoon, gikinahanglan una niya nga mopahuway ug mag-relaks.

“Of course, magpapahinga rin po, kailangan ko rin po,” dason pa ni Yulo.