NLEX, Magnolia magtinagakay

CEBU, Philippines —  Mag-abot ang NLEX Road Warriors ug ang Magnolia Hotshots sa seguradong kulbahinam nga tinagakay nga duwa sa PBA Commissioner's Cup karong adlawa (Dominggo, Pebrero 2) didto sa Ynares Sports Center sa Antipolo.

Kini tungod kay ang modaog sa alas 7:30 sa gabii nilang engkwentro maoy moangkon sa ikawalo ug katapusang luna sa quarterfinals ug makigharong sunod sa twice-to-beat top seed nga NorthPort Batang Pier.

Ang NLEX nakalihay sa sayong pagkatagak human gilampaso ang Eastern Hong Kong, 94-76.

Miresulta ang maong kadaogan sa Road Warriors sa pagkapapas sa tsansa sa San Miguer Beer nga makatikang sa playoffs.

Mao kini ang unang higayon sud sa 10 ka tuig nga ang Beermen nanamilit sa eliminasyon pa lamang.

Sa laing bahin, ang Magnolia nakaangkon og laing higayon nga mo-abante sa sunod nga hugna sa torneyo human gikastigo ang Meralco Bolts, 129-92, niadtong Biyernes sa gabii, Enero 31.