USA milampornas sa South Sudan: Sud na sa Olympics basketball quarterfinals
CEBU, Philippines — Si Bam Adebayo mikadlit og 18 puntos sa dihang gilampaso sa Team USA ang South Sudan, 103-86, aron pag-abante sa quarterfinal round sa Paris Olympic men's basketball tournament.
Nanginit og maayo sentro sa Miami Heat nga mipasud sa nag-una niyang unom ka itsa.
Ning higayona, si Boston Celtics superstar Jayson Tatum miduwa na samtang si Joel Embiid sa Philadelphia 76ers mao na sab ang gibangko ni coach Steve Kerr.
Si Kevin Durant miamot og 14 puntos samtang si LeBron Lames mihipos og 12 puntos.
"You've got guys from all ages in the league that have accomplished so much, but they're all unselfish players who want the best for the team," matud pa ni Durant, nga three-time gold medallist sa Olympics.
"I think we've got to continue to prove ourselves because other teams I've been on we won the gold, but as far as talent and what we look like on paper, it's probably the best team I've played on."
Sila si Anthony Edwards, Derrick White ug Devin Booker mireshistro sab og double digits, apan si Stephen Curry mikagar ang opensa ug mitapos lamang bitbit ang tres puntos.
Ang US team wala na molingi pa sukad miposte og 55-36 nga labaw sa halftime. Igo lamang nakapaduol ang South Sudan ngadto sa 10 puntos.
Si Nuni Omot mipabuto og 24 puntos samtang si Carlik Jones midugang og 18 puntos alang sa South Sudan kansang coach nga si Royal Ivey kanhi NBA player.
Bitbit ang duha ka daog sa Group C, ang US garantisado na og luna sa Final 8 uban sa Canada, Germany ug host France.
Sa laing bahin, ang Serbia namawi sa miagi nilang kaparotan batok sa US ug gipahimungtan sa ilang kapungot ang Puerto Rico, 107-66.
Si three-time NBA MVP Nikola Jokic usa lamang ka assist ang kuwang aron maka-triple double human siya mipupo og 14 puntos, 15 ka rebounds, ug siyam ka assists alang sa Serbia.
- Latest
