2-0 lead kinuha ng Celtics vs Mavs

BOSTON — Ipinakita ng Celtics na hindi lamang sina star guards Jayson Tatum at Jaylen Brown ang kanilang maasahan sa bawat laro.

Kumolekta si Jrue Holiday ng 26 points at 11 rebounds para gabayan ang Boston sa 105-98 pagdaig sa Dallas Mavericks sa Game Two at kunin ang 2-0 lead sa NBA Finals.

“I’m really tired of hearing about one guy or this guy or that guy and everybody trying to make it out to be anything other than Celtic basketball,” wika ni Celtics coach Joe Mazzulla. “Everybody that stepped on that court today made winning plays on both ends of the floor.”

Nagdagdag si Brown ng 21 points at tumipa si Tatum ng 18 markers, 12 assists at 9 rebounds para sa ikalawang sunod na panalo ng Boston sa kanilang best-of-seven series ng Dallas.

Umiskor si Derrick White ng 18 points, habang ang banked half-court basket ni Peyton Pritchard sa pagtunog ng third quarter buzzer ang nag-iwan sa Mavericks sa 83-74.

May 12 markers si 7-foot-2 center Kristaps Porzingis.

Nilimitahan ng Boston si Luka Doncic sa tatlong puntos sa kabuuan ng fourth period mula sa isang three-point play sa huling 1:15 para sa 98-103 agwat ng Dallas mula sa 14-point deficit.

“That’s why they are the No. 1 team in the NBA with the No. 1 record,” ani Doncic na naglista ng 32 points, 11 rebounds at 11 assists para sa unang NBA Finals triple-double sa Mavericks franchise history. “They have a lot of great players. Basically, anybody can get off.”

Matapos blangkahin ni Derrick Jones Jr. ang dunk attempt ni Tatum ay sinupalpal naman ni White ang potential dunk ni P.J. Washington.

Ang layup ni Brown ang nagtaas sa Celtics sa 105-98 kasunod ang mintis na triple ni Doncic sa huling 28 segundo.

Ililipat ang Games Three at Four sa balwarte ng Dallas.