Budong Gang ni Sara?
Usa sa mahimong sentro sa umaabot nga impeachment trial ni Bise Presidente Sara Duterte mao ang acknowledgment receipts nga gipirmahan sa giingong mga nakadawat sa iyang confidential funds:
1,992 ang tanang mga ngalan nga nalista, pipila nila kadaghan nakadawat og pundo gikan sa Office of the Vice President (OVP) ug Department of Education (DepEd); ug
1,322 (o 66%) ang gideklarar sa Philippine Statistics Authority (PSA) nga wala sa ilang database, sa ato pa dili tinuod nga mga tawo kay walay rekord sa pagpanganak, sa pagpakasal ug sa pagkamatay.
* * *
Sa peke nga mga ngalan, dunay walo nga gitawag sa House panel of prosecutors nga mga sakop sa “Budol Gang” sa bise presidente. Kay klarong inimbento: Mary Grace Piattos, Pia Piatos-Lim, Renan Piatos, Fernando Tempura, Carlos Miguel Oishi, Reymunda Jane Nova, Chippy McDonald ug Xiaome Ocho.
Ambot mao bay aktuwal nga gikaon (kalanog kaha sa kagumkom sa upisina ug kabusog tingali sa tanan niyang mga sinugo, salamat sa atong hinagoan ug siningtan nga buhis) samtang pinaspasay nga naghimo sa mga resibo nga gisumiter ngadto sa Commission on Audit (COA).
* * *
Dugang mga ngalan nga walay rekord sa PSA:
Kokoy Villamin nga giilang taga Butuan sa duha ka resibo sa OVP ug DepEd, pero managlahi ang pirma;
Alice Cresencio nga nipirma og tulo ka resibo sa usa lang ka adlaw, pero lainlain ang agi, pirma ug address (Pasay City, Iligan City ug Lanao del Sur);
Milky Secuya nga nigamit og samang tinta ug bolpen pero managlahi ang pirma sa duha ka resibo; ug “Sally” kansang pirma pareha sa laing resibo sa ngalan nga “Shiela.”
* * *
Tungod sa paugat ni Senate President Chiz Escudero nga unya pa sa Hulyo 30 sugdan ang husay, dunay kapin sa lima ka buwan silang Bise Presidente Duterte sa pagpili unsay kinakusgan nilang depensa:
Ipakita silang Mary Grace Piattos ug kaubanan atubangan sa senator judges ug pamatud-an nga ang PSA maoy bakakon; o
Mo-insistir sila nga ang OVP ug DepEd naghimo og higanteng operasyon nga dili ika-detalye kay labihan ka-sekreto ug ang tanang informants dili kanganlan (bahala unsay sulti sa joint memorandum circular sa confidential funds) kay mahulga ang nasudnong seguridad.
* * *
- Latest
