Pagdupa sa mga alyas
Sa impeachment trial ni Bise Presidente Sara Duterte, ug salamat ni Senate President Chiz Escudero duna silay lima ka buwan nga lugway pagmaniobra aron dili madayon o pagpangandam sa depensa kon dili kapugngan, hukman sa mga Duterte unsay mas lig-ong lusot sa kuwestiyonableng mga nakadawat sa P612.5 milyones nga confidential funds sa Office of the Vice President (OVP) ug Department of Education (DepEd):
Nga tinuod nga taga Davao si Mary Grace Piattos ug taga Butuan si Kokoy Villamin; o
Nga mga alyas ang gigamit aron sa pagpanalipod sa informants.
* * *
Ang pangugat ni Senador Bato dela Rosa nga daghang Piattos sa Davao gidasonan sa duha ka bag-ong ngalan sa acknowledgment receipts sa OVP nga nasubay sa mga kongresista nga silang Pia Piatos-Lim ug Renan Piatos. Nga ikapresentar untang mga paryente ni Mary Grace kon dili pa lahi ang spelling sa ilang apelyido.
Mas lisod pa gyong duphan ang binuang nga mga ngalan. Kay laing bag-ong nakit-an maong iya ni Xiaome Ocho. Nga nisamot sa bugalbugal sa nahaunang lista: Fernando Tempura, Carlos Miguel Oishi, Reymunda Jane Nova ug Chippy McDonald.
* * *
Mahimong matental ang depensa pagkopya sa linya sa Duterte trolls: Mga alyas ang naa sa mga resibo ug dili angayng ilhon kay mameligrong mga nitabang sa OVP ug DepEd pagpalig-on sa nasudnong seguridad.
Pero lisod lalison ang gibutyag ni kanhi Commissioner Heidi Mendoza sa Commission on Audit: Nga gisugo sa mga lagda sa confidential funds nga ang mga alyas apilan og selyadong listahan sa tinuod nga mga ngalan. Maong, sama sa ilang naandan, gihulga sa trolls nga patyon si Mendoza.
* * *
Puwerte ba gyong dalidali sa mga sinugo ni Bise Presidente Duterte pagtabon sa gipaingnan sa kuwarta nga nahutdan na sa inimbento nga 1,992 ka mga ngalan mao nga giapil na lang paglista ang ilang paboritong mga pagkaon ug telepono?
Laing posibilidad, ug para nako mas katuohan ning pangagpas: Nagpataka lang sila og suwat sa mga resibo kay nagsalig ang bise presidente ug iyang mga sinugo nga suod sila sa presidente (nakumbinser sa sigeng balikbalik ni Marcos Jr. nga BFF sila) ug masaligon nga walay mangahas sa pagsusi sa ilang mga transaksiyon.
* * *
- Latest
