EDITORYAL — Way mga batasan

Napuno og maayo ang Cebu City Sports Complex niadtong Sinulog 2025 nga natigayon og Enero 19 aron motan-aw sa showdown kay mao kini ang kina grandiyosong Sinulog sukad niadtong pandemiya sa Covid-19.

Mao nga dili lang mga ordinaryong mga tawo ang nanan-aw adto kondili hasta pud mga inilang personalidad sa showbiz ug sa politika. Apan dunay mga nasagol nga mga dili maayo og mga pamatasan, bastos ug wala sa lugar ang taras.

Sa pag-abot nilang Senador Risa Hontiveros, Atty. Chel Diokno ug kanhi senador Bam Aquino, inay nga pag-abi abi, gisugat sila og pagtamay sa pipila ka tawo sa grandstand, hinuon di tanan, apan igo-igo aron sila madungog sa ilang pagkawalay batasan.

Samtang giinterbyu sila sa mga nag-cover nga local media, gi boo nila ang senadora ug ang mga kauban niini. Bisita ang grupo sa Pista Senyor!

Ang uban nga nag-video nga nagsige og boo sa grupo mapasigarbuhon pa gyud nga ni post ani sa ilang mga social media samtang nagsinggit-singgit og “Duterte.” Tingali, ang uban ani nila nangangkon pang deboto sila sa Balaang Bata! Unya gikan pa nisimba!

Unsa kahay sala aning grupo ni Hontiveros aning mga nagbugal-bugal kanila?  Gikawatan ba sila nila? Gibastos ba sila sa grupo o gitamay?

Kani sila si Hontiveros ug Bam Aquino sa dihang senador pa ang naulahi, ubay-ubay nga mga balaod ang nasuwat nga nakabenepisyo ang tanang mga Pilipino ilabi na ang mga hut-ong sa kababayen-an, mga Kabataan ug mga mamumuo o mga trabahador.

Basin pa gani ang kadtong mga nagbugal-bugal nabulahan pa adtong mga balaora. Kay klaro kaayo sa mga tingog nga dunay mga babayeng nangugat og singgit, duna say mga lalaki nga klaro kaayo sa tingog.

Dili man sab tingali ni sila mga estambay, kay maka-afford man og ticket sa Sinulog showdown, sa ato pa, posibleng nanarbaho gyud ni sila.

Mao nga daghang mga lumad nga mga Sugbuanong netizens ang wala gyud makauyon sa ilang gibuhat, dunay mga miingon nga dili mga Cebuano ang maong mga tawo nga nagbugal-bugal sa mga bisita.

Hinuon dili tanang bisita nga dili Cebuano ang nibugalbugal sa grupo ni Hontiveros kay mas daghan man ang nagpakahilom lang ug nagpabilin ang pagtahod sa okasyon nga Pista sa Senyor.