Mallorca, Cablao nanghawod sa CEPCA "Battle of Champions"

CEBU, Philippines — Ang wild card nga si Marquis Angelo Mallorca ug si Dr. Edwin Cablao naghari sa tagsa-tagsa nila ka dibisyon sa panapos sa tuig nga torneyo sa Cebu Executives and Professionals Chess Association nga giulohan og "Battle of Champions" niadtong Dominggo, Disiembre 15, didto sa panimalay ni CEPCA President Engr. Jerry Maratas sa Royal Cebu Estates sa Consolacion, Cebu.

Ang 12-anyos nga si Mallorca, sakop sa BRD Chess Academy ubos sa paggiya ni International Master Joel Pimentel, maoy milangkat sa korona sa Class A human gikumpleto ang lima ka hugna nga kompetisyon bitbit ang labing taas nga 4.5 puntos.

Si Mallorca, gikan sa dakbayan sa Lapu-Lapu, milupig sa mga beterano niyang kontra nga sila si Rosendo Yamyamin, Arena Candidate Master Peterson Sia, National Master Arnolito Cadiz ug Amado Olea Jr. sa wala pa sila magtabla ni NM Rogelio Enriquez Jr. sa ikalima ug katapusang hugna nga mao lamang ang iyang gikinahanglan aron angkonon ang P5,000 nga premyo.

Sila si Olea ug Enriquez parehong mitali og 4.0 puntos apan si  Olea ang mikubra sa P3,000 nga ikaduhang ganti kortesiya sa mas taas niyang tiebreaker. Si Cablao nakigsawo sa dungog uban ni Mallorca human gilangkat ang Class B title.

Ang doktor sa edukasyon nga si Cablao nagtabla ug si Leo Cortes uban ang managsamang 4.5 puntos apan si Cablao ang mibulsa sa P5,000 nga unang ganti tungod sa mas dako niyang tiebreak points. Si Jonathan Canque ang mipahiluna sa ikatulong puwesto uban ang 3.5 puntos.