Nganong nag-binastos
Bisan gituohan nga dili mahigalaon ang pagtuki sa mga kongresista sa mas dakong budget sa Office of the Vice President (OVP) sa 2025, walay nagpaabot sa resulta:
• Wala makaandam ang mga kongresista labi nang tagdumala sa deliberasyon nga si Stella Quimbo sa ka-arogante, ka-bastos, ka-hambogera ug kataphaw ni Bise Presidente Sara Duterte Carpio sa pag-isnab sa ilang mga pangutana; ug
• Wala kaandam si Carpio nga human sa unom ka oras niyang kutas nga pagbasa sa sinuwat nga mga tubag sa bisan unsang mga pangutana gilangay sa House ang iyang budget.
* * *
Ambot naapil ba sa plano ni Carpio ang pag-atubang pagbalik sa mas andam ug mas masuk-anong mga kongresista unya sa Septiyembre 10, nakalainlain ang mga pangagpas sa iyang tuyo:
• Nagtuo bang mahilom ang mga kongresista, moduko sa iyang popularidad, mopasar sa budget ug mosalig na lang sa plenaryo pagtuki sa mga detalye?;
• Gitental bang mga kongresista pag-contempt ug pagtanggong niya aron makaangkon og dugang sukaranan ang nagmingaw nilang awhag sa people power?; o
• Gikapoy lang sa briefing unsaon pagtubag ang tanang posibleng mga pangutana maong wala na lang mangandam?
* * *
Nagbuwa nang baba sa Duterte trolls pag-aleluya ni Carpio nga nag-inusara pagpukan sa tibuok Kongreso. Niinsistir sila nga:
• Nahibawo si Carpio nga nahukman na sa liderato sa House nga laslasan og dako ang OVP budget maong walay kapuslanan ang pagtagad sa mga pangutana nga klarong gisabotan nang daan sa pagbitik niya; ug
• Masaligon si Carpio nga ang pangisog maka-pasidaan sa mga kongresista nga ang mangahas pagsilot niya dili pasayluon sa 32 milyones nga nibotar niya niadtong 2022.
* * *
Kon mapakyas ang mga Duterte pagpalagpot ni Presidente Ferdinand Marcos Jr., ang mayoriya sa House ug Senado dili mahadlok pagsilot ni Carpio:
• Dili kaabot og P1 bilyon ang iyang budget sa 2025, mahimo ganing ibanan sab ang kapin sa 400 niya ka guwardiya; ug
• Ma-impeach siya sa House (106 ang gikinahanglan pagpasar sa articles of impeachment, wala rang katunga sa 280 ka alyado ni Speaker Martin Romualdez), ma-konbikto siya sa impeachment trial sa Senado (upat ra ka senador ang modupa niya) ug dili makadagan pagka presidente sa 2028 (apil sa silot sa impeachment ang perpetual disqualification from holding public office).
- Latest
