Pag-aresto kay Duterte at mga kilos-protesta
KALIWA’T KANANG protesta ang isinasagawa ng supporters ni dating President Duterte matapos arestuhin noong Marso 11 sa NAIA sa bisa ng warrant of arrest na ipinalabas ng International Criminal Court (ICC) dahil sa kasong crime against humanity. Si CIDG Director Maj. Gen. Nicolas Torre III ang nanguna sa pag-aresto sa kahilingan ng Interpol.
Nagkaroon ng 12 oras na standoff bago tuluyang naisakay sa eroplanong naghatid sa The Netherlands ang dating Presidente. Ayaw siyang bitawan ng kanyang pamilya at iba pang dati niyang Cabinet officials. Subalit ginawa ni Torre ang lahat para maisakatuparan ang iniatang na tungkulin.
Si Duterte ay nahaharap sa mga kasong pagpatay na nangyari noong 2011 hanggang 2016 na siya ay mayor pa ng Davao City. May mga kaso rin ng extrajudicial killings (EJKs) na isinampa sa kanya noong siya na ang Presidente ng bansa habang ipinatutupad ang marahas na kampanya laban sa illegal na droga.
Ayon sa Philippine National Police (PNP), nasa 6,000 ang mga biktima ng EJKs pero ayon sa human rights group, posibleng nasa 30,000 ang mga napatay nang ipatupad ang “Oplan Tokhang”.
Sa mga nangyaring pagpatay, maraming beses inihayag ni Duterte na siya ang responsible sa mga naganap na police operation. Inaako niya ang mga nangyari at siya lang daw ang dapat managot.
Muli na naman niyang inulit na inaako ang responsibilidad sa mga nangyari nang makarating sa The Hague. Ipinresenta na si Duterte sa ICC prosecutors noong Biyernes (Marso 14) at ang sunod na pagdinig sa kanyang mga kaso ay magaganap sa Setyembre 23, 2025. Mayroon nang mga abogado si Duterte na magtatanggol sa kanya.
Mula nang dalhin sa The Netherlands si Duterte ay nagsagawa na ng mga kilos protesta ang kanyang supporters sa Luzon, Visaya at Mindanao. Hinihiling nila na ibalik si Duterte sa bansa. Ayon sa mga supporters, illegal ang pagkakaaresto kay Duterte. Wala na raw hurisdiksiyon ang ICC sa Pilipinas sapagkat kumalas na ito noong 2019.
Ayon sa mga nasagap kong balita, may mga hakbang na umanong isinasagawa ang mga kaalyado ni Duterte upang sampahan ng kaso ang mga responsable sa pag-arresto at pagbiyahe sa dating Presidente sa The Netherland.
Kasabay niyan, napag-alaman ko rin na naghahanda ang PNP sa pag-aresto kay Sen. Ronald “Bato”dela Rosa na isa rin sa sinampahan ng kaso sa ICC. Maaring lumabas na rin sa lalong madaling panahon ang arrest warrant laban kay Bato. Nagpapasaklolo naman si Bato sa Senado.
Abangan.
- Latest
