Tour of Luzon papadyak sa Abril 24
MANILA, Philippines — Magbabalik ang maalamat na Tour of Luzon, isang eight-stage, 1,050-kilometer race, sa Abril 24 na pakakawalan sa Laoag City, Ilocos Norte at magtatapos sa Mayo 1 sa Camp John Hay sa Baguio City.
Ang pagbuo sa nasabing karera ay inisip nina Metro Pacific Tollways Corporation (MPTC) Chairman at CEO Manny V. Pangilinan at DuckWorld PH chairman Pato Gregorio noong nakaraang taon.
“The Tour of Luzon is not just a race; it is a symbol of grandness and nobility. Its greatness lies in its vision—a vision that dared to conquer the impossible through sheer force of will, discipline, and determination,’’ ani Pangilinan.
“We conceptualized it more than a year ago because of our chairman (Pangilinan), who kept saying ‘I want to see a Filipino or a Philippine team in the Tour de France.’ Even back then, MVP kept saying it repeatedly,” dagdag ni Gregorio kahapon sa press conference sa Meralco Lighthouse sa Pasig City.
Papadyak ang 150 riders mula sa 15 hanggang 20 teams na kinabibilangan ng mga Continental Teams na 7Eleven Roadbike Philippines, Standard Insurance Philippines, Victoria Cycling Team at Go For Gold Cycling Team at ang national under-23 team.
Inimbitahan din ang tig-isang tropa mula sa Singapore, Indonesia at Thailand.
Mag-aagawan sila sa premyong P1 milyon para sa team champion at P500,000 para sa individual winner.
Sumuporta sa proyekto sina Philippine Sports Commission chief Richard Bachmann at Philippine Olympic Committee at PhilCycling president Abraham Tolentino.
Kasunod ng 170km Laoag to Laoag Stage One ang 80km Team Trial sa Stage Two mula sa Laoag papunta sa Vigan, Ilocos Sur sa Mayo 25.
Bibitawan ang 170km Vigan-Agoo Stage Three sa Abril 26 kasunod ang 150km Agoo-Clark Stage Four sa Abril 27, 120km Clark-Clark (via New Clark City) Stage Five sa Abril 28, 150km Clark-Lingayen Stage Six sa Abril 29 at ang 30km Lingayen-Lingayen individual time trial Stage Seven sa Abril 30.
Huling pepedal ang mga siklista sa 180km Lingayen-Baguio Stage Eight sa Mayo 1 na hihirang sa Tour of Luzon champion.
Bibigyan din ng premyo ang mga stage winners, Sprint King, Best Young Rider, Eagle of the Mountain,” ani race commissaire Jun Lomibao.
- Latest
