Duha patay sa pabuto

CEBU, Philippines — Duha ang patay sa aksidente sa pabuto nga Goodbye Philippines ug Bombshell atol sa pagsugat sa Bag-ong Tuig sumala pa sa kapolisan. Ang usa nila 10-anyos nga bata nga taga Talisay City.

Sa Talisay City, namatay ang 10-anyos nga batang lalaki ug samdan ang tulo ka bata ug 18-anyos human sila naigo sa binuak nga tiles ug bato gikan sa ilegal nga pabuto nga “Goodbye Philippines” pipila ka oras human sa pagsugat sa Bag-ong Tuig diha sa Purok Camunggay, Barangay Candulawan, Dakbayan sa Talisay ala-una sa kaadlawon Enero 1 ning tuiga.

Si Joel Sisa, operations head sa City Disaster Risk Reduction and Management Office (CDRRMO) nibutyag nga nakadawat sila og tawag bahin sa mga batang nangabuthan.

Matud pa ni Sisa nga natusak-tusak ang kalawasan sa mga biktima human nangaigo sa shrapnel nga gipataban sa  gipabuto nilang napunitan nga Goodbye Philippines, niresulta sa kamatayon sa 10-anyos nga si Jermie Cagang.

Si Kapitan Josefina Concial sa Candulawan nibutyag nga nakabsan sa kinabuhi ang bata dihadiha kay naigo kini sa mga buak nga tiles ug bato nga nilapos sa iyang kasing-kasing.

Nagkanayon si Concial nga sa wa pa nahitabo ang disgrasya ang upat ka managhigala nga nagpangidaron 16, duha ka 10-anyos, ug ang 8-anyos nagtan-aw sa usa ka lalaking nagsige og pabuto.

Matud pa dunay pabuto nga nikagar nga ilang gipunit ug pagkahuman giyabo ang pulbora ug gipatung-an kini og binuak nga tiles ug mga bato. Ang 18-anyos matud pa maoy miiwag sa mga bata sa ilang gibuhat gamit ang cellphone.

Apan sa pagtalikod na niya aron mopalayo, miulbo dayon ang sipang buto. Kay matud pa gipusdakan na diay sa mga bata og dakong bato ang Goodbye Philippines.

Kusog kaayo ang pag-ulbo niini ug nangalagpot ang mga tiles nga maoy nakatusak sa mga bata nga naa sa duol, samtang gamay lang ang naangkong kadaut sa 18-anyos nga nakadistansiya gikan nila.

Ang upat nadala kini sa Cebu South Medical Center tungod sa grabeng pagkaangol diha sa ilang mga bilahan, dunay naukab ang tuhod, naigo sa dapi-dapi, ang mga mata ug uban pa nga parte sa lawas.

Matud pa ni Concial gikompirmar sa mga bata nga “Goodbye Philippines” ang pabuto nga ilang gipusdakan og bato human nila gipakitaan og hulagway niini. Si Jesel Dejacto ang inahan sa namatay nangangkon nga wala siya makabantay nga nigawas ang iyang anak human sa media noche.

Nakadungog nalang siya og sipa kaayong buto nga nakapauyog sa yuta.Pagsusi niya sa gawas nakita niya ang iyang anak nga nahagba nga nagkadugo ug wala na maglihok.

Ang hepe sa Talisay City Police Station Police Lt. Col. Epream Paguyod, nibutyag nga naa na sa ilaha ang 27-anyos nga giingong maoy nagsige og pabuto adtong Goobye Philippines human kini boluntaryong nitahan sa barangay.  Gisusi nila kung diin niya napalit ang maong pabuto nga gidili man kini.

Bombshell

Sa laing aksidente sa pabuto, patay sab ang 23-anyos nga lalakeng vlogger human nibuto sa iyang nawong ang gituohan niyang nikagar nga fireworks nga Bombshell atol sa pagsugat sa Bag-ong Tuig sa national highway, Barangay San Roque, Lungsod sa Asturias niadtong Enero 1, 2025.

Ang biktima mao si Clifford Amarilla Remis, 23, residente sa naasoy nga dapit. 

Nagkanayon si Police Captain Jan Ace Elcid Layug, tigpamaba sa Cebu Police Provincial Office (CPPO) sa impormasyon nga nakuha nila gikan sa Asturias Municipal Police Station nabuthan kini og pabuto nga bombshell.

Ang bombshell usa ka matang sa fireworks nga paluparon ug adto unta mobuto sa ibabaw.

Matud pa seven shooter ang maong pabuto apan unom ang nilupad pataas , nagtuo ang biktima nga nikagar kini mao nga iyaha kining gilili apan nibuto kini sa iyang nawong, patay na kini pagabot sa tambalanan matud pang Layug.

Giingong local vlogger ang biktima ug posible ga-video kini sa selebrasyon. —Decemay Padilla, Rowena D. Capistrano (BANAT NEWS)