Suspek sa pagpamusil sa Pier 4 nailhan na sa kapolisan
CEBU, Philippines — Aduna nay suspek ang Police Station 3 sa Cebu City Police Office sa nahitabong pagpamusil niadtong Domingo sa hapon diha sa Pier 4, Sitio Silangan 2, Barangay Tejero, Siyudad sa Sugbo nga niangol sa 23-anyos nga lalaki.
Ang maong biktima nga si alyas “Jefferson” residente usab diha sa nahisgutang lugar ang anaa pa sa tambalanan.
Matud ni Police Major John Yango, hepe sa Police Station 3 nga ang biktima ug ang suspek nag-estoryahanay kini sa wala pa mahitabo ang pagpamusil.
Giingong gisultihan sa suspetsado ang biktima nga dili magsige og pamaligya og asin apan giingong nikatawa lang kini hinungdan nga nasuko ang suspetsado ug gipusil ang biktima.
“Ang uban man gud kanang naay mopalit bitaw og shabu kaning gitawag namo og parok mamalit sila og shabu ang kani pod disposer or tigpamaligya wala sila'y available shabu or item mahutdan sila ilang tunolan og asin kaning mangwartahay ni sila ba, pinutos gihapon na siya, mura siya'g shabu tan-awon, padayag ni Yango.
Nisulod diha sa gate sa Pier 4 ang suspek apan nibalik sa agi ug giusban og pusil ang biktima hinungdan nga nakaangkon kini og tulo ka samad pinusilan sa iyang lawas.
Human sa pagpamusil dili na makatingog ang biktima apan gisuwat niini sa iyahang bukton ang ngalan sa suspek gamit ang iyang dugo.
Base sa report sa kapolisan nga ang biktima ug suspetsado giingong parehong nalambigit sa ilegal nga drugas.
Ang suspetsado dali kining nisibat human sa pagpamusil ug padayong gipangita sa kapolisan. (BANAT NEWS)
- Latest
