Gin Kings puro na sa korona
MANILA, Philippines — Dinalawahan ng Barangay Ginebra ang TNT Tropang Giga matapos ang 73-66 panalo sa Game Five para makalapit sa korona ng Season 49 PBA Commissioner’s Cup kahapon sa Smart Araneta Coliseum.
Itinagay ng Gin Kings ang krusyal na 3-2 lead sa kanilang best-of-seven championship series ng Tropang Giga at dumikit sa pagkopo sa pang-17 titulo.
Iniskor ni import Justin Brownlee ang 16 sa kanyang 18 points sa second half para sa ikalawang sunod na panalo ng Ginebra sa serye habang kumolekta si Scottie Thompson ng 16 markers, 10 rebounds at 5 assists.
“We all knew from our side that Justin was struggling little bit more with his hand today than he was in the last game,” ani coach Tim Cone kay Brownlee na naglalaro na may dislocated right thumb.
“Even though Justin made some big shots down the stretch it was really the inspiration of Scottie that turned the tide for us,” dagdag nito kay Thompson.
Humakot si import Rondae Hollis-Jefferson ng 19 points at 12 boards at may 19 markers din si Rey Nambatac sa panig ng TNT.
Matapos ilista ang kauna-unahan nilang bentahe sa 53-51 mula sa jumper ni Brownlee sa huling dalawang minuto ng third period ay nakalayo ang Gin Kings sa 69-66 sa 3:16 minuto ng fourth quarter mula sa magkadikit na tirada ni Thompson.
Hindi na nakaiskor ang Tropang Giga na nabaon sa 66-73 sa natitirang 50.9 segundo makaraan ang basket ni Brownlee.
Inangkin ng TNT ang Game One, 95-89, at Game Three, 87-85 habang nakabawi ang Ginebra sa Game Two, 71-70, at Game Four, 95-78. (RC)
- Latest
