Karong gabii sa big dome TNT, Ginebra managlahi ang misyon sa Game 4
CEBU, Philippines — Managlahi nga misyon ang buot makab-ot sa TNT Tropang Giga ug Barangay Ginebra Kings sa Game 4 sa best-of-seven PBA Governors' Cup finals nga gikatakda karong adlawa (Dominggo, Nobiembre 3) didto sa Smart Araneta Coliseum sa Quezon City.
Ang Tropang Giga mosuway pagposte og 3-1 nga bentaha, samtang ang Gin Kings naglaraw nga tablahon ang serye sa alas 7:30 sa gabii nilang engkwentro.
Ang Gin Kings nakalikay nga mahug sa 3-0 nga kawot human gibaslan ang Tropang Giga, 85-73, sa Game 3 niadtong Biyernes.
"We certainly played a lot better, especially on defense," matud pa ni Ginebra coach Tim Cone human sila miresbal sa TNT.
Si Justin Brownlee maoy nangu sa krusyal nga daog sa Gin Kings uban ang 18 puntos, 13 ka rebounds, upat ka assists, upat ka blocks ug usa steal.
"Justin struggled offensively, especially against an elite defender in Rondae Hollis-Jefferson but he's not quitting defensively," dason pa ni Cone agi'g pagdayeg sa alas niyang import.
Si Cone nanghinaut nga makakuha og susamang enerhiya ug kadasig gikan ni Brownlee sa ilang laraw nga usban og parot ang Tropang Giga ug putlon ang serye ngadto na lang sa best-of-three.
- Latest
