Pagtilok sa sekretong pundo
Si Bise Presidente Sara Duterte, kon duna pa lang untay kaikog, dili angay nga maghilas-hilas og awhag sa mga kongresista sa pag-imbestigar giunsa paggasto ang P4.57 bilyones nga confidential ug intelligence funds ni Presidente Ferdinand Marcos Jr. sa 2023.
Kay naglikay-likay si Duterte–pinaagi sa mga paukyab, panghudlat, pamakak, panginsulto ug pagtago ug pagpasakit-sakit sa iyang mga sinaligan–sa imbestigasyon sa House Committee on Good Government sa kuwestiyonableng mga gasto sa confidential funds sa Office of the Vice President (OVP) ug Department of Education (DepEd) sa 2022 ug 2023.
* * *
Pero lehitimo ang awhag. Nga gikopya ni Duterte gikan sa mga grupong nagsusi giunsa pagtilok sa presidente ang kinadak-ang CIF sa burukrasya. Kon gitutokan ang mga transaksiyon sa P612.5 milyones nga confidential funds (CF) ni Duterte, nganong dili man lilion ang mas kahibulongan nga gasto sa CIF sa presidente nga kapin sa P12.5 milyones kada adlaw sa 365 ka adlaw sa 2023?
Kon dunay Mary Grace Piattos ug Kokoy Villamin si Duterte, unsa may garantiya nga wala mabanhaw silang Tagean Tallano ug Tomoyuki Yamashita sa mga resibo ni Marcos?
* * *
Dili makatabang ni Marcos ang pagdupa sa mga kongresista sa iyang CIF sa walay pagsusi nganong walay nahibilin pagtapos sa 2023. Sa walay pagsubli sa mga dokumento, taphaw ang ilang pasabot sa dakong responsibilidad sa presidente sa nasudnong seguridad.
Dili kapalusot si Marcos nga gikopya ra niyang mas dakong CIF ni kanhi Presidente Duterte. Kay mas malambuon ug malinawon ang nasud ubos sa administrasyon ni anhing Presidente Noynoy Aquino nga duna ray P500 milyones nga CIF kada tuig.
* * *
Pero nahibawo tang tanan nga dili mangimbestigar ang mga kongresista sa CIF ni Marcos. Kay Malakanyang ang mosabwag sa pork barrel ug dili mo-risgo ang mga kongresista sa ilang komisyon. Kon wala pa kang kabantay, ang imbestigasyon sa CF ni Duterte wala itumong pagbawi sa kinawat nga kuwarta kon dili sa pagpahagsa sa karibal nga dinasiya.
Bisan pa sa klarong pamolitika sa administrasyon, angay gihapong suportahan ang gitakdang impeachment ug pagkiha ni Duterte. Maayo na lang nga mabadlong ang katunga. Kay sa tibuok pangurakot gyod unta ang makalusot. Kon wala pa sila mag-unay.
* * *
- Latest
