Pagsusuot ng face mask, gawing boluntaryo - IATF
MANILA, Philippines — Inirekomenda na ng Inter-Agency Task Force of Emerging Infectious Diseases (IATF) kay Pangulong Ferdinand Marcos Jr. ang boluntaryong pagsusuot ng face mask sa mga open space, ayon sa Malacañang.
Sinabi ni Press Secretary Trixie Cruz-Angeles, ang rekomendasyon ng IATF ay gawin ng optional ang pagsusuot ng face mask sa mga hindi mataong outdoor areas at may magandang bentilasyon.
“Doon sa IATF, ang kanilang rekomendasyon ay pag-liberalize ng ating mask wearing mandate and make mask wearing outdoors voluntary across the country,” ani Cruz-Angeles.
Nilinaw ni Cruz-Angeles na hindi pa ito polisiya pero gagawin ang pilot testing ng boluntaryong paggamit ng face mask bago matapos ang taon.
Binanggit din ni Cruz-Angeles na ipinunto ng Department of Tourism na tumaas ang turismo sa ilang mga bansa na nagluwag na sa paggamit ng face mask.
“Nagprisinta ang DOT na in certain states na nagluwag na, tungkol sa face mask ay tumataas ang tourism nila,” ani Cruz-Angeles.
Seryoso aniya itong ikinokonsidera dahil mahalaga ang turismo sa pagbangon ng ekonomiya.
Pero kailangan pa rin aniya na magkatugma ang Department of Health at ang DOT tungkol sa usapin.
“Gawa nga ng front and center ang ating turismo sa pagbangon ng ekonomiya, this matter is being taken seriously. However, the DOH will still have a major say in it. So, kailangan magkatugma iyong ating DOH at ang ating DOT and other agencies bago tayo mag-revise ng ating mask policy,” ani Cruz-Angeles.
- Latest
