Kinsay bugo sa ICC

Imbes tarungon pagtubag ang kasong crimes against humanity sa iyang amahan, gipasanginlan ni Bise Presidente Sara Duterte nga bugo ang abogado sa  sa International Criminal Court (ICC). Kay walay lista sa mga ngalan sa 30,000 nga giingong napatay sa administrasyon ni kanhi Presidente Rodrigo Duterte.

Gihimong personal nga atake human nipahibawo sa awhag sa kanhi presidente sa ilang mga dumadapig sa dili pagkomentaryo sa kaso. Nahimo sab human nagpatuong kalma ug kontrolado niyang sitwasyon. Gipamatud-an sa bise presidente nga wala siyay tuohan (bisan iyang amahan) ug dili matago ang tinuod niyang batasan.

* * *

Wala nganli sa bise presidente ang abogado nga iyang giisip nga bugo. Giinsulto ba niya si ICC Prosecutor Karim Khan, nga beterano sa pag-imbestigar sa war crimes, genocide ug crimes against humanity sa Iraq, Afghanistan, Ukraine ug Gaza? O ubang mga abogado sa Office of the Prosecutor (OTP) nga pulos eksperto sa international criminal law?

O gipakauwawan ba niyang tulo ba ka babayeng huwes sa ICC Pre-Trial Chamber 1, nga gipasidunggang mga tigpanalipod sa tawhanong katungod, nga maoy niluwat sa arrest warrant batok sa iyang amahan?

* * *

Makaambas bang rekord sa bise presidente isip abogada? Walay nahibaw-an nga bisan unsang kaso nga iyang nadaog sa korte. Bisan nahimo siyang partner sa Carpio & Duterte Lawyers uban sa iyang bana nga Manases Reyes Carpio.

Gibisto sa Philippine Center for Investigative Journalism (PCIJ) nga ang ilang law firm wala marehistro sa Securities and Exchange Commission (SEC). Maong dunay sukaranan ang mga pagduda sa ka-lehitimo sa ilang operasyon ug kon nakabayad ba sa tukmang mga buhis.

* * *

Samtang gradwado silang Khan ug ICC judges sa bantogan nga mga eskuylahan sa ilang mga nasud (Britanya, Romania, Benin ug Mexico) niang gilista ni  Bise Presidente Duterte nga mga kurso nga gikuha:

Gradwado siya sa Bachelor of Science in Respiratory Therapy (BS RT) sa San Pedro College sa Davao City sa 1999;

Nagpa-enroll sa wala niya ilha nga medical school sa Manila kay ganahan siyang mag-pediatrician, pero nahagbong sa first semester; ug

Nagpa-enroll siya sa San Beda College of Law, samang eskuylahan ni kanhi Presidente Duterte, pero didto ni-gradwar sa San Sebastian College-Recoletos sa Manila sa 2005.

* * *

leolastimosa@gmail.com