Kings mibihag sa Cavs

CEBU, Philippines — Nakapasol og dakong isda ang Sacramento Kings didto sa ilang korte human ilang gibihag ang Cleveland Cavaliers, 123-119, sa NBA kagahapong adlawa didto sa Golden 1 Center sa Sacramento, California, Si DeMar DeRozan maoy nangu sa pito ka players sa Sacramento nga mikadlit og double figures uban ang 27 puntos.

Ang balanseng opensa sa Kings maoy hinungdan sa pagkatagak sa Cavs ngadto sa 56-13.

Wala na hinoon kini epekto alang sa Cavs kay segurado na man silang sud sa playoffs.

Sa laing bahin, ang Oklahoma City Thunder yanong milampornas sa Philadelphia 76ers, 133-100. Kini bisan og tuyo nga gipapahuway sa Thunder ang sinaligan nilang si Shai Gilgeous-Alexander.

Si Aaron Wiggins mipupo og 26 puntos alang sa Thunder nga padayong naghari sa West uban ang 57-12 rekord. Nagsunod kanila ang Houston Rockets, nga miinat sa ilang baraha ngadto sa 45-25 human gipaksit ang Orlando Magic, 116-108.

Si Jalen Green mikolekta og 26 puntos samtang si Alperen Sengun miamot og 22 puntos, 12 ka rebounds ug upat ka assists sa ikawalong sagunson nga daog sa Rockets.

Didto sa Minnesota, nalangay pa ang plano sa Timberwolves nga maka-angkon og awtomatik nga luna sa playoffs human sila gituhak sa bisita nilang New Orleans Pelicans, 119-115.

Si Zion Williamson mitali og 29 puntos alang sa Pelicans nga midaog man tuod apan wala nay tsansa nga maka-abante sa sunod nga hugna sa torneyo.