Dul-an 300 ka tawo gipadad-an og showcause order sa Comelec
CEBU, Philippines — Niabot ngadto sa dul-an sa 300 ka mga partido ug indibidwal ang napadalhan na og showcause order tungod sa pagpataka pagpahimutang sa ilang mga campaign materials.
Kini ang gibutyag ni Commission on Election Director Francisco Pobe nga gikahinabi sa mga tigbalita.
Matud pa ni Pobe, sukad nagsugod ang campaign period sa mga kandidato sa nasyonal hangtud niadtong adlaw nga Sabado Marso 15, 2025 niabot ngadto sa 268 ka mga partido ug indibidwal ang napadalhan og showcause order.
Lakip sa mga kalapasan nga ilang nahimo mao ang pagpamutang og mga campaign materials nga wala sa mga designated area.
Sumala pa ni Pobe ang maong mga kandidato gipahatag og katin-awan nganung dili sila angay pasakaan og kaso.
Gibutyag ni Pobe anaa sa dili mominos sa 28 mil ka mga propaganda materials ang ilang natangtang sa nagpadayong operasyon baklas sa tibuok Central Visayas.
Ang opisyal sa COMELEC naglaum nga mas modaghan pa kini sa pagsugod na unya sa local campaign period sa Marso 28. Subay niini nanawagan karon ang Comelec sa mga kandidatong lokal nga mahimong ehemplo sa katarong inay magpabadlong pinaagi sa pagpamutang sa mga campaign materials sa bisan asa nga lugar nga wa itugot base sa lagda sa comelec. (BANAT NEWS)
- Latest
