39 ka barangay nakadawat na og tag P5M nga ayuda

CEBU, Philippines — Niabot sa 39 ka barangay sa Dakbayan sa Sugbo ang nahatagan na og tag P5 milyones nga cash assistance isip suporta sa kagamhanan sa pagsuporta sa mga proyekto ug mga programa sa barangay.

Gilangkuban kini sa mga barangay sa Santo Nino, San Roque, Taptap, Hipodromo, Pulangbato, Babag, Guadalupe, Ermita, Zapatera, Sta. Cruz, Malubog, Sambag 1, Sambag 2, Sudlon 1, Sudlon 2, Binaliw, Pamutan, Bulacao, Pasil, Sawang Calero, Banilad, Pit-os, Ramos, Sirao, Tejero, Tabunan, Agsungot, Boot, Budlaan, Day-as, Parian, Sapangdako, Sinsin, Talamban, Kamagayan, Adlaon, Basak Pardo, Pahina San Nicolas, ug Pung-ol Sibugay.

Gipangulohan ni Mayor Raymond Alvin Garcia ang distribution sa ayuda atol sa flag raising ceremony kagahapon diha sa Plaza Sugbo kauban sila si Konsehal Jerry Guardo ug Edgardo “Jaypee” Labella II.

Giklaro ni Garcia nga adunay pundo alang sa 80 ka barangay sa siyudad apan gikinahanglan nga mosumite una kini og project proposal; barangay resolution sa ilang proposed projects; Utilization Report sa Barangay Financial Assistance sa tuig 2023; notariyado nga affidavit of undertaking nga naka-liquidate sa financial assistance alang sa tumong sa identified projects ubos sa project proposal; ug certificate sa unutilized funds nga kinahanglan alang sa balance sa utilization report kong nilapas ba sa P100,000 ang nagasto.

Ang tag P5 milyones nga cash assistance gidawat kini sa opisyales sa barangay diin  dako kining tabang sa pagpundo sa ilang mga gitinguhang pagpalambo sa ilang mga barangay. (BANAT NEWS)