Taguig LGU nagbabala vs pekeng ayuda

MANILA, Philippines — Nagbabala sa publiko ang pamahalaang Lungsod ng Taguig laban sa kumakalat na maling impormasyon tungkol sa diumano’y programang medical at financial assistance mula sa mga konsehal ng lungsod.

Ayon sa Taguig local government unit (LGU), may ilang grupo ang nananamantala sa publiko sa pamamagitan ng paghimok sa mga residente na magtungo sa opisina ng mga konsehal upang magsumite ng requirements kapalit ng tulong pinansyal o medikal.

Nilinaw ng lokal na pamahalaan na walang ganitong programa ang mga konsehal, at mariin nilang kinokondena ang ganitong mga panlilinlang sa mga mamamayan.

Pinayuhan ng LGU ang publiko na huwag basta maniwala sa hindi beripikadong impormasyon at tiyaking sa mga opisyal na anunsyo lamang ng lungsod kumuha ng detalye tungkol sa mga lehitimong serbisyo at tulong.

Para sa mga opis­yal na impormasyon, maaaring bisitahin ang opisyal na social media pages ng Lungsod ng Taguig o makipag-ugnayan lamang sa kanilang mga tanggapan.