Inahan, bombero naangol atol sa sunog sa Mambaling

CEBU, Philippines — Pito ka balay ang apektado sa sunog nga niulbo diha sa Sitio Centro, Alaska Barangay Mambaling, Dakbayan sa Sugbo kagahapon sa kadlawon.

Ang sunog naglambigit og residential houses nga giingong gipanag-iya ni Jophil Lisondra.

Ang maong sunoh giisa ngadto sa first alarm pagka-alas 3:48 sa kadlawon ug nakontrolar ang kayo pagka alas 4:20 ug gidaklara nga fire out pagka-alas 4:37.

Walay gikataho nga nakalas apan adunay naangol sa maong sunog.

Ang naango mao si Mary Ann Alegado, 47-anyos kinsa nakaangkon og second degree burn sa iyang bukton ug kamot.

Giingong si Alegado wala nanumbaling sa kainit sa kayo tungod kay iyang gigakos ang iyang duha ka anak samtang nagdilaab ang kayo.

Nasayran nga si Alegado naalimungawan sa ilang pagmata diin dako na kaayo ang kayo ug naglisod na sila sa pagbadbad sa wire nga ilang gihimong trangka sa pultahan.

Giingong ang manghud ni Alegado ang nangursonada ug nidasmag sa pultahan hinungdna nga nakagawas sila gikan sa ilang balay.

Gikataho nga ang kayo sa sunog diha nagsugod sa panimalay nila ni Alegado ug wala pa mapiho ang hinungdan niini.  Laing naangol mao si F03 Donald Densing, 35-anyos, minyo kinsa natagak sa tabay sa pagtubag sa alarma sa sunog.

Gibana-bang nikabat ngadto sa P750 mil ang danyos sa maong sunog diin pito ka panimalay ang apektado upat ang hingpit nga naugdaw og tulo ang partially burned.

Si Fire Officer 1 Pedie Canillas, fire investigator nagkanayon nga mopalawom pa sila sa ilang imbestigasyon pagsuta sa hinungdan sa sunog.

Nunot niini, base sa talaan sa Department of Social Welfare and Services upat ka  panimalay ang apektado sa sunog nga adunay 15 ka pamilya o 63 ka individuals.

Duha ka tawo ang natala sa DSWS nga naangol nga mao sila si Alegado ug Reynaldo Renihan.

Ang mga nasunogan temporaryong nagpuyo karon sa ilang mga paryente ug higala nga duol sa lugar nga nahitaboan. BDB BANAT NEWS