3 ka durugista sa Cebu City ug Mandaue sikop sa buy-bust

CEBU, Philippines — Nadakpan atol sa buy-bust operation sa kapolisan sa Mambaling Police Station sa Cebu City Police Office (CCPO) ang usa ka street level individual diha sa Sitio Ibabao, Barangay Mambaling, Siyudad sa Sugbo niadtong Domingo sa hapon.

Ang suspetsado mao si Jeffrey Lanada Dinglasa alyas “Paypay”, 40-anyos, walay trabaho, nagpuyo sa Sitio Lutaw-Lutaw, Barangay Tisa, Siyudad sa Sugbo.

Nakuha gikan sa suspetsado ang lima ka gramong shabu nga nikantidad tanan ngadto sa P34,000 ug kalibre .38 nga revolver.

Base sa taho sa Mambaling Police Station nga ang suspetsado giingong pusher sa Barangay Tisa ug dako ang duwa sa dinakpan.

Giingong ang suspetsado nangangkon nga gikan sa iyang amigo ug gibilin ra kaniya ang armas nga nakuha.

Apan nahibaw-an sa kapolisan nga giprenda ang armas ngadto sa suspect bugti sa shabu.

Kasong kalapasan sa Section 5 ug Section 11, Article II sa Akta Republika 9165 kun “Comprehensive Dangerous Drugs Act of 2002” ang ipasak  batok sa suspetsado.

Sa laing bahin, duha ka tawo ang nasikop atol sa buy-bust operation diha sa managkalahing lugar sa kapolisan sa Mandaue City Police Office (MCPO).

Nadakpan atol sa buy-bust operation sa Presinto 1 sa MCPO pinangulohan ni Police Major Jovito Labra mao  ang usa ka 29 -anyos nga taga San Vicente, Lungsod sa Liloan niadtong Domingo sa gabii diha sa Brangay Ibabao-Estancia, Dakbayan sa Mandaue.

Samtang nadakpan usab sa kapolisan ang 59-anyos nga si alyas "Tatay", taga Kalderohan, Barangay Maguikay, Dakbayan sa Mandaue atol usab sa buy-bust operation sa Casuntingan Police Station  pinangulohan ni Police Major Eric Gingoyon pinaagi sa team leader nga si Police Master Sargeant Wilkins Henricoso. (BANAT NEWS)