EDITORYAL - Wa makapahimulos sa minerales sa Pilipinas

Dunay daghang minerals ang Pilipinas, dili man tuod sama kamahal sa mga bulawan dako gihapon kini og gamit isip raw materials sa mga gamit nga gkinahanglan kaayo sa mga tawo karon sama sa mga electronic gadgets.

Bisan ang mga balas sa Pilipinas adunay makolektang mga rare Earth metals o rare Earth elements (REEs) sama sa bauxites, ion-adsorption clay ug Ni laterites nga importante kaayong sagol sa uban pang mga minerals aron mapuslan sa tawo sa paghimo og mga kagamitan ilabi na sa electronic parts.

Laing mga minerales nga naa dinhi mao ang copper, nickel ug cobalt nga diin dako og potensyal aron makatabang sa ekonomiya sa Pilipinas tungod kay materyales kini nga gigamit sa elektrisidad.

Ang Pilipinas maoy ikalima sa tibuok kalibotan nga adunay pinakadaghan og nickel deposits.

Kaning tulo palang daan kung tarungon lang pagdala sa gobiyerno ilabi na sa mga lokal nga kagamhanan, dako kini og matabang sa pagpalambo sa ekonomiya sa nasud ilabi na karong panahona ang tanang mga nasud nagtinguhang mo-adopt aning green economy.

Ang green economy nagkinahanglan og renewable resources aron modagan ang makinarya, ug kining tulo ka minerales gigamit isip raw materials sa green technologies sama sa paghimo og solar panels, lithium-ion batteries ug daghan pang uban.

Daghan kaayo kining mga minerales nga dili nato mahinganlan tanan dinhi apan kining tanan makita ug makuha gikan sa Pilipinas, gawas pa niini nasuta sab nga mas kini og kalidad kun itandi sa mga susamang minerales gikan sa nagkalainlaing mga nasud.

Apan subo lang nga dili mga Pilipino ang nakabenepisyo og dako gikan niini kondili ang mga langyaw nga kompanyang maoy nag-mina niini gikan sa nagkalain-laing probinsya sa nasud.

Numero unong mga nagmina niini karon sukad sa panahon sa administrasyong Duterte mao ang China. Silay mokubkob ug ilaha kining dad-on ngadto sa ilang nasud aron iproseso aron himuong mga parte sa electronic parts sama sa mga cellphones, computers, microchips, appliances ug daghan pang uban.

Tinuod nagkinahanglan ang Pilipinas og dolyares kay dili man mahimong ipalit ang piso ngadto sa global market, apan anugon kaayo nga wala gyud makapahimulos og maayo ang mga Pilipino gikan aning mga mineral deposits nga naa na sa nasud.