Ekonomiya sa Sugbo misaka og 6.0 porsyento sa tuig 2023

CEBU, Philippines — Ang economic performance sa Probinsya sa Sugbo niuswag niadtong 2023 apan ang tulo ka highly urbanized cities (HUCs)—Cebu City, Mandaue City, ug Lapu-Lapu City, nakasinati og mas hinay nga pagtubo sa ekonomiya sa 2023.

Sumala sa taho sa Philippine Statistics Authority Central Visayas (PSA-7) atol sa Provincial Product Accounts (PPA) Dissemination Forum, ang ekonomiya sa Probinsiya sa Sugbo nitubo og 6.0 porsyento niadtong 2023 gikan sa 5.0 porsyento sa nilabay nga tuig.

Kini nagrepresentar sa pagsaka sa value sa gross domestic product (GDP) ngadto sa P411.32 bilyones sa 2023 gikan sa P388.6 bilyones niadtong 2022.

Sa samang tuig, ang lalawigan sa Sugbo nakasinati og positibong pag-uswag sa dagkong mga industriya, uban sa "Agriculture, Forestry, ug Fishing" (AFF) nga mitubo sa 3.4 porsyento, and "Industriya" nga miuswag sa 4.1 porsyento, ug ang mga "Services" misaka sa 7.3 porsyento.

Samtang ang services adunay pinakadako nga bahin sa ekonomiya nga 62.0 porsyento, gisundan sa industriya nga 29.1 porsyento, ug agrikultura nga 8.9 porsyento.

Nag-unang kontributor sa 6.0 porsyento nga pagtubo sa ekonomiya mao ang professional and business services, construction ug wholesale ug retail trade, pag-ayo sa mga sakyanan ug motorsiklo.  Ang sektor nga dunay pinakadako nga bahin sa ekonomiya mao ang manufacturing (14.9 porsyento), wholesale ug retail trade (14.8 porsyento), ug professional ug business services (12.7 porsyento).

Ang per capita growth sa mga produkto sa lalawigan sa Sugbo gibanabana nga mokabat sa P120,082 niadtong 2023 nga mas taas og 4.3 porsiyento sa P115,079 niadtong 2022.

Sa laing bahin, sa 2023, ang economic growth rates sa Cebu City, Lapu-Lapu City, ug Mandaue City nihinay kumpara sa lebel niini niadtong 2022.

Ang Cebu City adunay 8.3 porsyento nga pagsaka sa 2023, nga ubos og 0.2 porsyento kun intandi sa 8.5 porsyento niadtong 2022. Ang Lapu-Lapu City adunay 9.4 porsyento nga pagsaka, nga mas ubos og 3.8 porsyento sa 13.2 porsyento sa miaging tuig, samtang ang Mandaue City nakatala og growth rate nga 7.6 porsyento sa 2023, ubos og 1.5 poryento sa 9.1 porsyento niadtong 2022. (BANAT NEWS)