Fluvial procession sa Birhen sa Regla himoon karong Nobiyembre 12

CEBU, Philippines — Ang Fluvial Procession sa Imahen sa Birhen sa Regla adto gihapon manukad sa roro port sa lungsod sa Cordova.

Pagahimoon ang maong fluvial procession karong Nobiyembre 12, alas sayes sa buntag nga sugdan diha sa Our Lady of the Sacred Heart Parish sa Barangay Marigondon, ug molahos sa Roro Port sa Cordova ngadto na sa Muelle Osmeña, ug lahos na sa Nuestra Señora de Regla Parish National Shrine sa Barangay Poblacion, Lapu-Lapu City.

Mosubay ang procession sa kadagatan sa mga barangay gikan sa Cordova ug kabarangayan sa siyudad sa Lapu-Lapu.

Moagi usab kini sa Barangay Suba basbas lahus sa Barangay Gabi sa Cordova agi sa Centennial Road ngadto na sa Roro Port ug adto na isakay sa barko sa Topline nga maoy gihimong gallon.

Gikan sa Roro Port sa Cordova molawig ang barko ug ubang sakyanan sa kadagatan nga mokuyog sa fluvial subay sa Hilutungan channel agi sa kadagatan sa Barangay Alegria ug Gabi sa Cordova lahus sa kadagatan sa Barangay Marigondon, Agus, Maribago, Mactan, Punta Engaño liko sa wala balik agi sa Barangay Mactan deretso sa Barangay Buaya, Ibo, Pusok nga moagi sa Marcelo Fernan bridge lahus sa 1st Mactan - Mandaue bridge sa Barangay Pajo ug modunggo sa Muelle Osmeña wharf.

Ikanaug ang imahen ug sugaton nila ni Mayor Junard "Ahong" Chan ug Kongresista Ma. Cynthia Chan ug ubang opisyal sa siyudad ug ihatud sa simbahan sa Birhen sa Regla nga mao usab ang pagsugod sa siyam ka adlaw nga nobinaryo.

Karong Nobiyembre 20 ug 21 magsaulog sa iyang tinuig nga kapistahan ang dakbayan sa Lapu-Lapu diin ang patron niini mao ang Birhen sa Regla.

Pipila ka karsada ang sirhan palibot sa simbahan ug dunay rerouting ug one-way nga ipatuman sa mga karsada sa dakbayan.  MEL BANAT NEWS