COC guidelines gipagawas sa Comelec

CEBU, Philippines — Nagpagawas na ang Commission on Elections (COMELEC) og mga giya alang sa pag-file sa certificates of candidacy (COC) alang sa mga modagan sa midterm elections sa Mayo 2025.

Sa 38 ka pahina nga resolusyon, ang COMELEC nitataw nga walay ni kinsa ang mahimong mokandidato sa pagka-senador, miyembro sa House of Representatives o bisan unsang lokal nga posisyon gawas lang kun adunay gisumitir nga COC.

Ang COC mahimong personal nga i-file sa usa ka aspirant o pinaagi sa awtorisadong representante gikan sa Oktubre 1 hangtod Oktubre 8, 2024 lakip ang Sabado ug Domingo gikan sa alas 8 sa buntag hangtod sa alas 5 sa hapon.

Kato rang makaduso og COC ang makonsiderar nga kandidato sa pagsugod sa campaign period.

Atol sa pag-file sa COC, ang usa ka aspirante mahimo lamang magdala og tulo ka kauban samtang kadtong modagan sa pagka-senador mahimong magdala og upat, kini nga lakang nagtinguha nga malikayan ang overcrowding sa filing venues.

Kadtong parehas og pangalan og parehas og posisyong gidaganan, kinahanglang ilang ibutang ang ilang paternal ug maternal nga apelyido, gawas lamang sa incumbent nga mahimo nga magpadayon sa paggamit sa ngalan ug apelyido nga gigamit sa COC sa dihang siya na-elect kaniadto. Ang sayop nga COC idelarar nga “not filed” ug ang substitution tungod sa pag-withdraw sa orihinal nga aspirant gitugotan lamang hangtod sa katapusang adlaw sa pag-file sa COC.

Dili usab tugotan ang pag-ilis sa usa ka independente nga kandidato, gawas kung ang mopuli mag-file ug COC ug Certificate of Nomination and Acceptance. Dugang pa, ang pag-ilis human sa Oktubre 8 gitugot lamang kun mamatay o ma-disqualify ang orihinal nga kandidato.

Ang usa ka kandidato sa usa ka rehistradong partido politikal nga namatay o na-disqualify mahimong ilisan sa usa ka kandidato nga miyembro ug nominado sa iyang partido o koalisyon."

Ang bisan kinsang nagkupot og appointive nga posisyon sa gobiyerno  lakip na ang mga miyembro sa Armed Forces of the Philippines kun mokandidato maisip sila nga ni-resign sa katungdanan.

Gikan usab sa Oct. 1 to 8, kinahanglang i-file ang certificate of nomination ug certificate of acceptance of nomination sa mga party-list groups.

Samtang ang matag sektoral nga partido, organisasyon, o koalisyon kinahanglan mag-submit og 10 ka nominado aron morepresentar sa party-list.

Kun dili moabot og napulo ang nominado, dili dawaton sa Comelec ang ilang COC.--  IBM BANAT NEWS