ARQ Builders nakasagunson og daog sa MPBA Season 3
CEBU, Philippines — Ang ARQ Builders milansang sa ikaduha nilang sunod-sunod nga daog apan nag-agi usa sila og makuyaw nga dalan sa wala pa pioga ang Matia's Foodhaus, 73-71, sa Mandaue’s Pride Basketball Association (MPBA) Commissioner’s Cup Season 3 niadtong Sabado, Agosto 24, didto sa Cebu Port Authority (CPA) gym.
Si Ian Ortega mipupo og 18 puntos uban ang siyam ka rebounds ug upat ka assists, samtang si Jestony Baclaan midugang og 11 puntos, upat ka rebounds ug tulo ka assists alang sa ARQ nga miangkon sa solong liderato sa Elite Division uban ang 2-0 rekord.
Mipabuto si Kyle Dajalos og 27 puntos apan nakawang ang iyang paningkamot tungod kay ang Matia's nakatilaw sa una nilang pilde sud sa duha ka duwa.
Sa Premiere Division, ang Void ug ang Flago Prayboys parehong miinat sa ilang baraha ngadto sa 2-1 sa managlahi nga paagi.
Ang Void yanong mikastigo sa Slowgrind, 108-59, samtang ang Prayboys nakalingkawas batok sa Urestore, 82-79.
Si Jhon Rey Gequilan mihipos og 22 puntos, lima ka rebounds, ug upat ka assists, si Joshua Ybañez mitali og 16 puntos, samtang sila si James Balili ug Isiah Nanoy midonar og 12 puntos matag usa aron ituboy ang Void ngadto sa 49 puntos nga demolisyon sa Slowgrind.
Sa laing bahin, sila si Kenny Genobia ug Stephon Gonzales nagkumboya'g 33 puntos, unom ka rebounds ug pito ka assists alang sa Prayboys. Si Kibs Genobia mitampo og 14 puntos ug siyam ka rebounds, samtang si Mark Yaun miamot og 10 puntos, walo ka rebounds, usa ka assist ug tulo ka steals.
- Latest
