E-Painters ipininta ang ika-2 panalo sa Kadayawan tourney
MANILA, Philippines — Inilista ng Rain or Shine ang kanilang ikalawang sunod na panalo sa 39th Kadayawan Invitational Basketball Tournament matapos takasan ang Phoenix, 104-102, sa University of Southeastern Philippines Gym sa Davao City noong Biyernes.
Humakot si balik-import Aaron Fuller ng 21 points at 19 rebounds para sa Elasto Painters na nakahugot kay Gian Mamuyac ng 19 markers.
Nagdagdag si Anton Asistio ng 17 points sa kanilang ikalawang dikit na paglusot matapos ungusan ang UAAP champions La Salle Green Archers, 106-105.
Pinamunuan ni Tyler Tio ang Fuel Masters sa kanyang 19 points, habang naglista si Kent Salado ng 15 markers at pitong assists.
Kumolekta si import Jay McKinnis ng 10 points at 11 rebounds para sa Phoenix na nabigo sa Converge sa overtime, 127-132, noong Huwebes.
Samantala, ginulat ng Green Archers ang FiberXers, 120-112, sa likod ng 19 points ni EJ Gollena.
Ang mini-tournament ay preparasyon ng Rain or Shine, Converge at Phoenix para sa PBA Season 49 Governors’ Cup na didribol sa Agosto 18 tampok ang mga imports na may height limit na 6-foot-6.
- Latest
