60 gikalibanga sa Malabuyoc

CEBU, Philippines - Kapin sa 60 ka tawo kasagaran mga bata ang gikatahong nagkalibanga sa lungsod sa Malabuyoc duha ka semana na ang nakalabay sumala pa ni Dr. Rene Catan, hepe sa Provincial Health Office (PHO).

Matud pa niya walay nangamatay tungod kay natambalan dayon ang mga biktima. Gibutyag ni Catan nga ang hinungdan sa maong kalibanga mao ang kontaminasyon sa kagaw sa tubig nga ilang mainom.

Gibutyag ni Catan nga ang reservoir sa tinubdan sa tubig sa lungsod walay takob hinungdan nga nakontaminado kini sa kagaw. Ang reservoir gilimpiyohan na ug gipabutangan na kini og takub.

Ang PHO niining ulahi lang nagpadala og team kinsa mikuha og sample sa tubig aron masusi kung miubos na ba ang gidaghanon sa kagaw o E.coli diha sa tubig. 

Matud ni Catan nga aron malikayan ang samang hitabo kinahanglan nga usbon ang water system sa lugar lakip na niini ang pagsusi sa mga tubo kung wala ba kini buslot aron mailisan.

Ang reservoir kinahanglan usab nga sirado aron dili makasulod ang hugaw. Ang E-coli nagagikan sa ihi ug hugaw sa tawo ug mananap nga makaingon sa sakit nga diarrhea, cholera, tipos ug uban pa.

Sa laing bahin, ang PHO mipadala og suwat ngadto sa mayor sa lungsod sa Badian ug Alegria nga magbutang og mga signages nga magpahibawo sa publiko nga dili luwas imnon ang tubig diha sa lugar aron malikay sa risgo sa kontaminasyon.

Ang Kanlaob River nagsumpay kini sa lungsod sa Alegria ug Badian diin niining ulahi lang ang tubig sa sapa taas kaayo kini og kontaminasyon sa E. coli.

Ubay-ubay ang mga turista nga mobisita diha sa maong mga lugar tungod sa canyoneering. Hinuon gipasabot ni Catan nga ang kontaminasyon sa maong sapa  normal lamang tungod kay surface water man kini ug ang tanang hugaw nga naa sa yuta inig uwan masagol kini diha sa tubig.

Ang pagdagsa sa mga tawo diha sa lugar usa usab kini sa  hinungdan nga mosaka ang kontaminasyon ilabi na nga walay pansayan diha sa duol hasta ang kabalayan wa say pansayan ug aduna say mga gipangtugway nga mga hayopan.

Dugang ni Catan nga gihisgutan na nila tali sa Provincial Environment and Natural Resources Office (PENRO) ang maong problema diin ilang giplanohan ang pagbutang og mga pansayan o pagpabalhin sa mga nagpuyo diha sa ibabaw nga bahin sa sapa. (BANAT NEWS)