Duterte kay Marcos: Bigyan kami ng patas na eleksyon

MANILA, Philippines — Nanawagan si dating Pangulong Rodrigo Duterte kay Pangulong Marcos Jr. na bigyan sila ng patas na eleksyon sa darating na Mayo 12.

Ang panawagan ay ginawa ng dating Pangulo sa kanyang anunsiyo sa national coordinating meeting ng PDP-Laban senatorial candidates gayundin sa iba niyang kandidato sa lokal mula sa ibat ibang panig ng bansa.

“This coming election, I hope that the President, kung marinig niya ako, bigyan niya tao ng, sabi ko nga a fair, patas lang ang laban…kagaya ko noon, prangka-prangka ako sa mga taong, tayo na huwag kayong pumasok sa takutan pati ‘yung sa violence,” ayon kay Duterte.

Kabilang naman sa mga inindorso ni Duterte na kandidato ng PDP-Laban ay sina Senators Ronald dela Rosa, Christopher ‘Bong’ Go, gayundin ang abogadong si Jimmy Bondoc, Raul Lambino, Rodante Marcoleta, Jayvee Hinlo at ang aktor na si Philip Salvador.

Hinikayat din ng dating pangulo ang publiko na iboto ng straight ang nasa PDP-Laban slate.

Tumutok naman ang partido sa naturang pagpupulong tungkol sa strategic plans at  coordination efforts.