Mataas na viewership ng PornHub sa Pinas, ikinaalarma

MANILA, Philippines — Nagpahayag ng pagkabahala si Kabataan Partylist Rep. Raoul Manuel sa mataas na viewing sa Pilipinas sa mga PornHub sa internet na lubhang delikado na takaw tukso sa mga kabataang Pinoy.

Sa pagdinig ng House Committee on Basic Education and Culture kaugnay ng pinagtatalunang implementasyon ng Comprehensive Sexuality Education ng DepEd, ipinunto ni Manuel na noong 2023 ang Pilipinas ay ika-2 top viewer ng pornHub.

“Kasi I’m very alarmed no, na well ngayon hindi tayo top one, pero in terms of the usage of Pornhub sa bansa, Mr. Chair, ang Pilipinas, number two siya noong 2023 noong buwan ng Disyembre,” saad ni Manuel.

Aniya, ang Pilipinas bilang isang maliit na bansa pa ay kabilang sa top 5 sa mga mahihilig manood sa mga PornHub kung saan ang mga bata kung hindi magagabayan ng kanilang mga magulang ay magkakaroon ng kuryosidad dito na maari nilang gayahin at di batid ang maaring maging implikasyon.

Samantalang nitong 2024 ay ikatlo naman ang Pilipinas sa ­kategorya ng mataas ang viewership sa ­Pornhub kung saan ang Estados Unidos na isang malaking bansa ang nanguna at pangalawa naman ang France.

Ayon kay Manuel, bilang kinatawan ng mga kabataan, ay lubhang nakakaalarma kung ­ganito kalaganap ang paggamit ng ­pornograpiya o panonood ng mga malalaswang tipo ng content sa Pilipinas at dito’y puwedeng magkamali ang mga kabataan kung papaano ba talaga ang tamang pakikipagrelasyon.

Binigyang diin ni Manuel na ang DepEd ay dapat magkaroon ng sitema upang tiyakin na ang mga Pilipinong estudyante ay matututo ng tunay at tama upang hindi ang mga ito maligaw sa kanilang mga kaalaman.