Welec nakasagunson og daog sa Sinulog Cup

CEBU, Philippines — Ang Welec Trucking Services x AMC milupig sa University of Cebu (UC) Webmasters, 68-62, alang sa ikaduha nilang sagundon nga daog sa Sinulog Cup 2025 Basketball Tournament niadtong Miyerkules sa gabii, Enero 22, didto sa Cebu Coliseum.

Alkansi ang Welec og siyete puntos, 27-34, sa naghinapos nga bahin sa first half, apan milusad og madasigon nga resbak aron tablahon ang iskor, 39-39, sa wala pa miposte og 6-0 rally aron ilogon ang labaw, 55-49, sa hingpit sa sayong bahin sa katapusang kuwarter.

Si Kent Ivo Salarda na sab ang bida sa Welec human mikadlit og 21 puntos, siyam ka rebounds ug tulom ka assists.

Si Raul Gentallan mao lamang ang laing double-digit scorer alang sa Welec uban ang 10 puntos, usa ka rebound, tulo ka assists ug duha ka steals. Nangu si Webmasters mao si Ricofer Sordilla bitbit ang 13 puntos, upat ka rebounds ug upat ka assists.

Si Reggie Dajab mihipos og 11 puntos, tulo ka rebounds ug duha ka assists samtang si Danie Boy Lapiz mikimada og 10 puntos ug duha ka rebounds alang sa UC, nga natagak sa 1-1.

Sa laing bahin, ang RKF Iloilo Royals misikad sa ilang kampanya pinaagi sa 88-64 nga paglampornas sa Cebu City selection.

Si Cedrick Manzano mirehistro og double-double sa RKF uban ang 17 puntos ug 11 ka rebounds nga iyang gipalamanan og duha ka assists, duha ka steals ug tulo ka blocks.

Mikadlit sab si Wilmer Dalumpines og 17 puntos samtang si Jay Pee Belencion mikolekta og 14 puntos, duha ka rebounds ug tulo ka assists alang sa RKF Iloilo nga mangtas kaayo ug wala na mopaginhawa pa sa ilang kontra sukad sila milansang og 29 puntos nga bentaha, 65-36, sa halftime.

Si Zaionyl Rosano mikulit og 16 puntos, tulo ka rebounds ug upat ka steals samtang si Rey James Enriquez midugang og 10 puntos, tulo ka rebounds ug duha ka steals apan pareho silang naminghoy kay ang Cebu City selection nahisukamod sa ikaduhang sunod-sunod nga higayon.