Pamilya ng PDLs sa NBP nagpasaklolo kay Tulfo
MANILA, Philippines — Ilang pamilya ng Persons Deprived of Liberty (PDL) sa New Bilibid Prison sa Muntinlupa City ang lumapit kay ACT-CIS Cong. Erwin Tulfo dahil sa sobra-sobrang pananatili na raw ng kanilang kaanak na PDL sa New Bilibid Prison.
Ayon sa grupong Aid-Dalaw Nationwide International Movement (AIM), may 10,000 PDL sa NBP ang dapat laya na subalit patuloy na naghihimas ng rehas kahit tapos nang bunuin ang kani-kanilang sentensya.
“Ang reklamo nila tila hindi agad nare-review ang mga papel ng PDL na dapat ay lumaya na,” ani Tulfo.
Ang problema rin daw ay natetengga ang pagpirma ng release form ng PDL at hindi agad napipirmahan dahil sa rami na dapat na lumaya na rin”.
“Isang ginang ng AIM ang nagsabi na ang asawa niya ay nasentensyahan ng walong taong pagkakakulong dahil sa kasong homicide”, ani Rep. Tulfo. “Sampung taon na raw ang mister niya at sobra na ng dalawang taon sa sentensya sa kanya”.
Dagdag pa ni Tulfo, “ Kung mapapalaya lang ang 10,000 na overstaying na PDL sa NBP, tiyak luluwag ang ating BuCor”.
Nangako ang ACT-CIS Partylist solon na iimbestigahan kung saan talaga ang problema para maayos na ang isyung ito.
- Latest
