USC Golden Booters padayon nga naghari
Milangkat sa ikapitong sagunson nga korona sa CESAFI
CEBU, Philippines — Ang University of San Carlos (USC) Golden Booters mikumpleto og 6-0 sweep aron paglugwa nga kampiyon sa ikapitong sunod-sunod nga higayon sa college division sa Cebu Schools Athletic Foundation, Inc. (CESAFI) Season 24 men's football tournament didto sa Cebu City Sports Center niadtong weekend.
Ang Golden Booters mitak-op sa ilang kampanya uban ang duha ka daog batok sa University of the Philippines (UP) Cebu Fighting Maroons ug University of Southern Philippines Foundation (USPF) Kicking Panthers aron inaton ang makalisang nilang dominasyon sa liga.
Si Aureli Acuin Gaspe milansang og duha ka sagunson nga goals sa ika-76 ug ika-90 nga minuto aron ituboy ang mga Carolinians ngadto sa 2-0 nga pagpayaka sa UP Cebu, samtang si Junrey Calimposan mihatud sa USC ngadto sa 1-0 nga pagbuntog sa Kicking Panthers.
Ubos sa paggiya ni head coach Roseton Barinan inabagan nilang Dino Musni ug Gary Garciano, ang ubang mga sakop sa USC champion team mao sila si Christian Vierth Agot, Ludwig Ryan Badayos, Nathan Gamaliel Bajarias, Gianrenzo Andres Custado, Simon Andrei del Campo, Zidane de le Torre, Zram Uichi Ebrada, John Ryll Eldian, Jeff Leonard Labus, Vince Lamparas, Renk Miko Murillo, Khylle Joy Oporto, Deo Prinz Nino Ortiz, Nino Gianpaolo Pastrana, Andrei Raj Saberon, John Cyril Sinoy, John Roustin ug John Lloyd Suple, Benedict Ross ug Jascha Mari Tabar, Godwyn Aaron Tello, Christopher Valence ug Rafael Wandeler. Si Jinggoy Roa maoy ilang consultant.
Sa laing bahin, ang UP Cebu ug USPF magbangga alang sa ikaduhang puwesto sa alas-2 sa hapon karong Domingo, Disyembre 1, matud pa ni CESAFI football tournament manager coach Francis Ramirez.
Sa susamang adlaw sa alas-9 sa buntag, ang defending champion Don Bosco Technical College (DBTC)-Cebu ug ang karibal nilang Sacred Heart School-Ateneo de Cebu (SHS-AdC) Magis Eagles mag-ilog sa korona sa high school category sa seguradong dumot nga sangka.
- Latest
