Marcos: Mga tumulong para makatakas si Guo mananagot!

MANILA, Philippines — Tiniyak ni Pangulong Ferdinand Marcos Jr. na ­sisibakin at sasampahan ng kaso ang mga taong tumulong para makalabas ng Pilipinas si Alice Guo.

Sa ambush interview sa headquarters ng National Disasters Risk Reduction and Management Council (NDRRMC), sinabi ng Pangulo na lahat ng tumulong kay Guo para ilegal na makalabas ng bansa ay mananagot sa batas.

“Hindi lang namin sila sisibakin, kakasuhan pa namin sila dahil ang kanilang ginawa ay labag sa batas at against all of the interests of the Philippine judicial system,” sabi ni Marcos.

Magsilbi rin anyang babala sa mga nagnanais na tumakas sa batas ang pagkakaaresto kay Alice Guo.

Sa tanong na kung sinu-sino ang mga ito, sagot ni Marcos “you’ll find out soon”.

Kasabay nito, binati at pinasalamatan ni Pangulong Marcos ang mga otoridad na siyang nakaaresto kay Guo a.k.a Gua Hua Ping sa Tangerang City, Jakarta, Indonesia.

Pinasalamatan din niya ang gobyerno ng Indonesia dahil sa tulong na ibinigay sa Pilipinas at sa kooperasyon sa pagitan ng dalawang bansa para maaresto si Guo.