Alice Guo, Cassandra Ong kinasuhan ng money laundering
MANILA, Philippines — Pormal nang sinampahan ng money laundering charges ng ilang ahensiya ng pamahalaan si dismissed Bamban, Tarlac Mayor Alice Guo at 34 na iba pang indibidwal.
Ang kaso ay inihain ng National Bureau of Investigation (NBI), Presidential Anti-Organized Crime Commission (PAOCC), at ng Anti-Money Laundering Council (AMLC) sa Department of Justice (DOJ), kahapon ng hapon.
Bukod kay Guo, kinasuhan rin si Cassandra Li Ong, at iba pang incorporators ng ilang POGO firms, na kinabibilangan ng Hongsheng Gaming Technology, Baofu Land Development Inc at Zun Yuan Technology Inc., na sinasabing lumahok sa paglilipat ng pondo mula sa ilang fraudulent sources.
Sakop ng imbestigasyon ang bilyun-bilyong pisong halaga ng transaksiyon sa bank accounts ni Guo at assets mula 2019 hanggang 2024.
Kasama rin ang bank accounts at ari-arian, POGO companies at kanilang bank accounts, at mga umano’y shell companies na sangkot sa kanila.
Ayon sa NBI, isinampa nila ang kaso matapos na makakita ng link sa pagitan ng bank accounts ni Guo at shell companies na umano’y nagbabayad ng utilities at kuryente ng mga POGO buildings.
Isinagawa umano ang mga transaksiyon matapos umanong mag-divest si Guo mula sa POGO company.
Si Guo ay una nang inakusahan ng pagiging Chinese citizen at siyang nagpapasilidad ng POGO operations sa Bamban, Tarlac.
Pinaniniwalaang nakalabas na ng bansa si Guo at kasalukuyang nasa Indonesia.
- Latest
