Bersamin sa kaso ni Quiboloy: Hayaang umusad batas

MANILA, Philippines — Nanindigan ang Malakanyang na sinusunod lamang ang batas sa kaso ni Pastor Apollo Quiboloy.

Sinabi ni Executive Secretary Lucas Bersamin sa ambush interview sa Libingan ng mga Bayani sa Taguig City bilang paggunita sa Araw ng Kagitingan, na dapat manaig o mangibabaw ang batas.

“The law must takes its course,” giit ni Bersamin.

May proseso rin aniya ang batas at kailangan itong sundin.

Reaksyon ito ni Bersamin kaugnay sa alegasyon na ang operasyon at pag-aresto kay Kingdom of Jesus Christ (KOJC) founder Apollo Quiboloy ay politically motivated.

Si Quiboloy ay wanted dahil sa mga kasong paglabag sa Republic act 7610 o Special Protection of Children Against Abuse, Exploitation and Discrimination Act at Republic Act no. 9208 o Qualified Human Trafficking.

Tumanggi naman si Bersamin na magkomento tungkol sa tanong sa pahayag ni Vice-president Sara Duterte ng paghingi ng tawad sa mga miyembro ng KOJC dahil hinikayat niya ang mga ito sa iboto si Pangulong Bongbong Marcos noong tumatakbo pa lang bilang pangulo ng bansa.